9 इन कली चढ़ेबपुकीमी ठीक पतीके वा फेक्शो खोदेंशो पा फेक्समल। मिनु इन मुरपुकी ठेयब सेंदा पा ग्येरसमल।
10 इन गेय पाइब दाऊद आ पर्बम इन तेल लुक्शो कली मप्रोनीन।
11 परमप्रभु यावेमी दाऊद नु लोव़ पा कसम जशो बाक्त। मेकोमी “गो इ सासन पतीकेमी इ तौ का वोइक्नुङ” दे लोव़ पशो बाक्त। परमप्रभु यावेमी आ पशो लोव़ खाप्ब। भजन संग्रह ८९:४-५; हिब्रू ६:१७
12 मेकोमी “इ तौपुकीमी आं कबल नु आं देंशो पाम्तेक्म हना, मेको आन तौपुकी यो इ सासन पतीकेम सासन पचा ताइनीम” देंशो बाक्त।
13 परमप्रभु यावेमी सियोन कली योव़शो बाक्ब। “आं बाक्तीके मेकेर बाक्ब” दे मिम्शो बाक्ब। भजन संग्रह ६८:१७; भजन संग्रह ७६:३
14 मिनु परमप्रभुमी “एकेर नाइक्नुङ। एकेर गेना हना यो बाक्नुङ, मारदे हना गो मेको दाक्नुङ।
15 मिनु गो मेकेर ङा मुर आन कली शुश जचा तूचा गेशा, आसीक गेनुङमी। प्रुङग आन कली रूथ्री जचा गेनुङमी।
16 गो मेकेर ङा चढ़ेब आन कली मरिम्शो पतीके रे ब्रोंइतीक दोदेंशो बाक्बा तुइक्पाइक्नुङमी। मेकेर ङा थमा सुइक्बपुकी कुम्सो पा ग्येरसीनीम।
17 गो मेकेर दाऊद आ खिं ङा मुर आन मान बारपाइक्नुङ। आं तेल लुक्शो मुर कली रिम्शो तौ का गेता। १सामुएल २:१०; १राजा ११:३६
