30 तन्न परमप्रभु यावेमी मेको कली बेक्शो रे सेंताक्व। प्रेरित ३:१५
31 मिनु गालील रे यरूसलेम सम्म येसु नु काथा गाक्ब आन कली बेक्शो रे सेंसीशा शुश नाक्त तपांइसाक्व। मोदेंशो पा येसु कली सेंसीशो ताइबपुकीमी ‘येसु बेक्शो रे सेंचा पुंइसाक्व। मुल यो ब्रोंइशो बाक्ब। आंइ मिक्चीमी ताइतक’ दे शेंना शेंन गाक्नीम।
32 परमप्रभु यावेमी इं किकी पिपी आन कली ङोंइती पशो लोव़ पाप रे प्रोंइब का सोइश्शा खाप्शो, ग्येरपाइक्तीक लोव़ इन कली शेंनीकी।
33 मेको लोव़ साइ परमप्रभु यावेमी ब्रेक्पाइश्शो लोव़ नु गारब। मारदे हना भजन संग्रह कामी ‘गे आं तौ नवे। मुलाक्ती गो इ कली थीतन’ दे ब्रेक्शो बाक्ब। भजन संग्रह २:७
34 लेंशा मबेक्चा ङा नु मराक्चा ङा पा बेक्शो रे सेंसीशो आ पर्बम परमप्रभुमी ‘दाऊद कली गेशो खोदेंशो पा गो इ कली आसीक गेनन’ दे ब्रेक्पाइश्शो बाक्ब। यसैया ५५:३
35 मोपतीके दाऊदमी भजन संग्रह कामी ‘परमप्रभु यावे, इन योव़शो तौ कली बेक्शा लशा यो, राक्चा मगेनीनी’ दे ब्रेक्शो बाक्त। भजन संग्रह १६:१०; प्रेरित २:२७
