5 गो क्येर बाक्ती हना यो, दारशो बाक्नुङ। ए यरूसलेम ङा तमीपुकी, गो केदार आ ताम्बु नु सोलोमन आ फारतीक वा खोदेंशो क्येर बाक्नुङ। आं कली आइक्च ममिम्तीन।
6 आं कली क्येर तशा, मकोव़यीनी। मारदे हना चोक्शो नांमी आं कली क्येर सेल्ती। आं ममा आ तौपुकी गो नु गाइक्तीके आं कली अङगुर रू कोव़ब सेल्तीमी। तन्न गो आंम अङगुर रू कली चहिं मकोव़ङु।
7 ए आं दाक्शो मुर, इन क्यारश भेडा आन कली ते योव़नीनी? मिनु नाक्त मेको ते नाइक्नीमी? गो मारदे हेंथे गाक्ब मीश मुर खोदेंशो पा इन वारच आन बगाल आ नेक्था लचा माल्नुङा?
8 मीश आल आन दाते ङा नेल्ल क्येङा दारशो मीश आल, गे क्यारश भेडा आन गाक्तीक लां खोइश्शा, गोठला आन गोठ आ नेक्था इ पाठा आन कली योव़ङो।
9 आं दाक्शो मीश आल, गो इ कली फाराओ आ बग्गी ङा नेल्ल क्येङा दारशो छाउरी शारा नु थाप्शो बाक्नुङ।
10 गहना पांइसीशो इ चोव़चो गिश दारशो बाक्ब। सिक्री पांइसीशो इ शुर थम दारशो बाक्ब।
