6 मिनु मेको बालाक आ बाक्तीके लेश्शा जाक्त। मेना बालाक नु मोआब ङा ठेयब मुरपुकी चोशा चढ़ेतीके आ नेक्था राप्शा बाक्तेक्म।
7 मिनु बालाममी परमप्रभु आ देंशो लोव़ पा बालाकमी आं कली अराम रागी रे चाक्तु। नां दाप्तीके ङा पहाडम बाक्ब मोआबी आन पिपमी आं कली “जाक्कीन, मिनु आं पा ङा याकूब कली सराप चीले पने। इस्राएली आन कली हिंच कोंइदीमी” देंत।
8 मिनु “परमप्रभुमी सराप चीले मपाइश्शो आन कली, गो दोपा सराप चीले पाइक्नुङमी? परमप्रभु यावेमी हिंच मकोंइशो आन कली, गो दोपा हिंच कोंइनुङमी?
9 गो सेरथे फुल्लु तार बाक्शा, मेको आन कली ताइनुङ। गो डांडाम बाक्शा, मेको आन कली कोव़नुङ। मेको आन का ला बाक्ब जात ङा मुर बाक्नीम। मिनु रागी रागी ङा मुर नु मखाल्सीनीम।
10 याकूब आ मुर फुरक खोदेंशो पा शुश दुम्शो बाक्नीम। इस्राएल ङा मुर आन ४ भाग ङा भाग का यो, सुम हिक्ने चाप्नीमी ङा? उत्पत्ती १३:१६ गे आं कली ठीक पाइब मुर आन कली खोदेंशो पा बेक्चा गेयीनी। मिनु आं बेक्तीके मेको आन केन खोदेंशो दुम्ल” देंत।
11 मिनु बालाकमी बालाम कली “गे आं कली मार पनी? गो इन कली आं जोरी सत्रु आन कली सराप चीले पाइक्चा कली ब्रेश्शा चाक्तन्नी। तन्न गे दूली पा मेको आन कली आसीक कका गेतीनी” देंत।
12 मिनु मेकोमी “गो परमप्रभु यावेम आं थुंम वोइश्शो देंशो लोव़ ब्वाक्चा माल्नुङ” देंत। गन्ती २२:३८
13 मिनु बालाकमी मेको कली “गो नु अर्को बाक्तीके पिने। गे एकेर रे मेको आन कली ताइनीनी। मेकेर रे मेको आन कली इच्का ला ताइतीनी। नेल्ल आन कली तने मचाप्नीनी। मेको आन कली मेकेर रे सराप चीले पतीन” देंत।
14 मिनु मेकोमी मेको कली चोफीम ङा रू पिस्गा डांडाम लाइक्तु। मिनु ७ ओटा चढ़ेतीक सेल्शा, मेको तारी ब्यफ का का नु सांड का का चढ़ेप्तु।
15 मिनु बालाममी बालाक कली “गो परमप्रभु यावे कली ग्रुम्थ एर लाइनुङ। गे चहिं एको इन चोशा चढ़ेशो आ नेक्था राप्शा बाक्कीन” देंत।
16 मिनु परमप्रभु यावेमी बालाम कली ग्रुम्शा, आ थुंमी लोव़ वोइश्शा, मेको कली “गे बालाक आ बाक्तीके लेतो। इ कली देंशो लोव़ मेको कली मतो” देंत।
17 मिनु मेको बालाक आ बाक्तीके लेश्शा जाक्त। मेना बालाक नु मोआब ङा ठेयब मुरपुकी चोशा चढ़ेतीके आ नेक्था राप्शा बाक्तेक्म। मिनु बालाकमी मेको कली “परमप्रभु यावेम मार देंम?” दे हिल्लो पाप्तु।
18 मिनु बालाममी परमप्रभु आ देंशो लोव़ पा “बालाक बोक्शा, आं लोव़ नेनो। सिप्पोर आ तौ इ नोफा दाइक्तो।
19 परमप्रभु मुर ममाइ। मेकोमी जोल मपाइब। मेको बेक्शा लाइब मुर खोदेंशो पा आ थुं मफाइक्ब। मेकोमी लोव़ थोक्शा देंम ङा मेरे पाइब। मेकोम पाइक्नुङ देंम ङा मेरे मेको मपाइक्बा ङा? १सामुएल १५:२९
20 नेनीन, गो मेको आन कली आसीक गेतीक लोव़ तशो बाक्नुङ। मेकोमी मेको आन कली आसीक गेशो बाक्ब। मिनु गो मेको फाइक्ने चाप्नुङा ङा?
21 याकूब कली मरिम्शो मदुम्ब, देंशो बाक्ब। मिनु इस्राएली आन कली श्येत मदुम्ब। मेको परमप्रभु यावे, आन परमप्रभु मेकोपुकी नु बाक्ब। मिनु मेको आन दातेमी पिप बाक्ब।
22 परमप्रभुमी मेको आन कली इजीप्त रे ग्रुंइशा, आ सक्तिम मेको आन कली ब्वाकी ङा ब्यफ खोदेंशो सेल्शो बाक्ब।
23 थमा पा, याकूब कली राइब मारेइ मन्तर तन्तर मबाक्ब। इस्राएली आन कली राइब मारेइ लिंक्यु कोव़तीके मबाक्नीम। मुल याकूब नु इस्राएल आ पर्बम परमप्रभु आ पशो कोव़ङीन।
24 कोव़ङीन, मेको जात ङा मुर गुप्सनी खोदेंशो पा बोक्नीम। प्रेक्शा ग्राम्चा चिक्शो गुप्स खोदेंशो पा मेको छुल बोक्ब। मेकोमी सिखार मब्वा सम्म नु सिखार आ हुश मतूङा सम्म मनाइक्ब” देंत। गन्ती २४:९; इजीकीएल १९:२
25 मिनु बालाकमी बालाम कली “मेको आन कली सराप चीले मगेने, आसीक यो मगेने” देंत।
26 तन्न बालाममी बालाक कली “परमप्रभु यावेमी मार देंबा, गो मेको पचा माल्नुङ, दे गो इन कली ना कना मदेंङा ङा?” देंत।
27 मिनु बालाकमी बालाम कली “मुल पिने, गो इन कली अर्को बाक्तीकेमी लाइक्नन्नी। मेकेर रे गे आं पा ङा मेको आन कली सराप चीले पचा कली परमप्रभुमी दाक्बा कों?” देंत।
28 मिनु बालाकमी बालाम कली पेओर डांडाम लाइक्तु। मेकेर रे गोरशो रागी नेल्ल तांइसाक्व। गन्ती २२:४१; गन्ती २५:३
