2 मिनु इस्राएलीपुकीमी परमप्रभु यावे कली “गे एको मुर आन कली थमा पा आंइ गुइमी गेतीनी हना, गोपुकीमी मेको आन सहर नेल्ल रोवल चिवल पोक्नीकी” दे कसम जाम्तेक्म। ब्यवस्था १३:१६; ब्यवस्था २०:१४,१६,१७; यहोसु ६:१७; न्यायाधीस १:१७; १सामुएल १५:३
3 मिनु परमप्रभु यावेमी इस्राएली आन पुंइशो लोव़ नेंशा, मेको कनानी आन कली मेको आन गुइमी गेप्तु। मिनु इस्राएलीपुकीम मेकोपुकी नु मेको आन सहर नेल्ल खतम पोक्तेक्म। मोपतीके मेको रागी आ नें होरमा वोइक्तेक्म। होरमा हिब्रू लोव़मी खतम दुम्तीके देंसीब।गन्ती १४:१४,४५; ब्यवस्था १:४४
4 मिनु मेकोपुकी एदोम रागी कली हेरशा लचा, दे होर डांडा रे लल समुन्द्र गे लाम्तेक्म। तन्न मुरपुकी शुश गाक्चा माल्तीके दाम्तेक्म। गन्ती ११:४-६
5 मिनु मेकोपुकीम परमप्रभु नु मोसा आस पर्बम गन गन पा “मारदे गे आंइ कली एको गोरशो रागीम बेक्पाइक्चा कली इजीप्त रागी रे ग्रुंइशा एक चाक्सी? एकेर जचा थोव़क मबा। ब्वाक्कु यो मबा। गो एको मब्रोव़शो जचा थोव़क क्येङा ब्रीताक्क” देंतेक्म।
6 मिनु नोले परमप्रभु यावेमी बीस पाइश्शो बुस्स मेको मुर आन दातेमी सोइक्ताक्व। मिनु बुस्सपुकीमी मुर आन कली कोक्तेक्म। मिनु शुश इस्राएली बेक्तेक्म। १कोरिन्थी १०:९
7 मिनु मुरपुकी मोसा आ बाक्तीक जाक्शा “गोपुकीम परमप्रभु यावे नु इन पर्बम मरिम्शो लोव़ पा पाप पाइतक। मेको बुस्सपुकी खेरचा, दे परमप्रभु यावे कली आंइ पर्बम पुनीन” देंतेक्म। मिनु मोसामी मेको मुर आन पर्बम पुंइतु। प्रस्थान ३२:३०-३४
8 मिनु परमप्रभु यावेमी मोसा कली “गे मेको बीस पाइश्शो बुस्स खोदेंशो पा बुस्स का सेल्शा, ख्रांबा काम क्युक्को। मिनु सु बुस्सुम कोक्शो बाक्मे, मेकोमी मेको बुस्स कोव़शा, ब्रोंइब” देंत। २राजा १८:४; यूहन्ना ३:१४
9 मिनु मोसाम कांसा के बुस्स का सेल्तु। मिनु मेको कली ख्रांबा काम क्युक्तु। मिनु सु सु बुस्सुमी कोक्शो बाक्मा, मेकोपुकीम कांसा के बुस्स कोव़ङमेनु, ब्रोंइतेक्म।
10 मिनु इस्राएलीपुकी गाक्शा, ओबोथम बाक्तीक सेल्तेक्म।
11 मिनु ओबोथ रे गाक्शा, मोआब आ पूर्ब गे ङा सांद इये-अबारीम ङा गोरशो रागीम बाक्तीक सेल्तेक्म।
12 मिनु मेकोपुकी मेकेर रे गाक्शा, जेरेद ङा बेंसीम बाक्तीक सेल्तेक्म।
13 मिनु मेकोपुकी मेकेर रे गाक्शा, एमोरी आन सांदम ग्रूतीक गोरशो रागीम बाक्शो अरनोन खोला आ आइक्ची हांबुम आन बाक्तीक सेल्तेक्म। मेको अरनोन खोला मोआब आ सांद बाक्ब। मेको एमोरी नु मोआबी आन दातेम बाक्ब।