7 थमा पा दिप्बपुकीम जोक्ब तुइक्ब मुर आन कली मूर्ख सेल्नीम। घूसमी मुर आन थुं मरिम्शो सेल्ब।
8 गेय पचा गोशो क्येङा थुम्शो रिम्शो दुम्ब। ठेयब लेश्शो थुं पाइश्शो दुम्चा क्येङा फाल्तीक थुं पाइश्शो दुम्चा रिम्शो बाक्ब।
9 रीब पा मगाइक्तो। मारदे हना गाइक्तीक मूर्ख आन थुंम बाक्ब। याकूब १:१९
10 गेपुकीम “ङोंइती ङा नाक्त, मुल ङा नाक्त क्येङा मारदे रिम्शो बाक्मा?” दे मदेनीन। मारदे हना जोक्ब तुइक्बपुकीम मोदेंशो लोव़ हिल्लो मपाइनीम।
11 जोक्तीक तुइक्तीके किकी पिपी आन गेशो शोंप खोदेंशो पा रिम्शो बाक्ब। मिनु मेकोमी ब्रोंइब आन कली रिम्शो पाइब।
12 दोपा क्येटीम मुर आन कली वारच पाइबा, मोपा जोक्तीक तुइक्तीकेम यो मुर आन कली वारच पाइब। मिनु जोक्तीक तुइक्तीकेमी मुर आन कली ब्रोंइचा गेब। हितोपदेस ३:१-२
13 परमप्रभु आ गेय मिम्तीन। मेको आ रोप्शो थोव़क कली सुमी दिंपाइक्ने चाप्बा ङा? उपदेसक १:१५
14 नाक्त रिम्शो दुम्मेनु ग्येरसीन। तन्न नाक्त मरिम्शो दुम्मेनु मिम्तीन। मेको निम्फा परमप्रभुमी सेल्शो बाक्ब। मोपा मुरुमी नोले आंम कली मार दुम्बा, दे मतुइक्नीम।
