32 ופקדתי בשבט פשעם ובנגעים עונם׃
33 וחסדי לא אפיר מעמו ולא אשקר באמונתי׃
34 לא אחלל בריתי ומוצא שפתי לא אשנה׃
35 אחת נשבעתי בקדשי אם לדוד אכזב׃
36 זרעו לעולם יהיה וכסאו כשמש נגדי׃
37 כירח יכון עולם ועד בשחק נאמן סלה׃
38 ואתה זנחת ותמאס התעברת עם משיחך׃
39 נארתה ברית עבדך חללת לארץ נזרו׃
40 פרצת כל גדרתיו שמת מבצריו מחתה׃
41 שסהו כל עברי דרך היה חרפה לשכניו׃
42 הרימות ימין צריו השמחת כל אויביו׃
43 אף תשיב צור חרבו ולא הקימתו במלחמה׃
44 השבת מטהרו וכסאו לארץ מגרתה׃
45 הקצרת ימי עלומיו העטית עליו בושה סלה׃
46 עד מה יהוה תסתר לנצח תבער כמו אש חמתך׃
