1 למנצח שיר מזמור הריעו לאלהים כל הארץ׃
2 זמרו כבוד שמו שימו כבוד תהלתו׃
3 אמרו לאלהים מה נורא מעשיך ברב עזך יכחשו לך איביך׃
4 כל הארץ ישתחוו לך ויזמרו לך יזמרו שמך סלה׃
5 לכו וראו מפעלות אלהים נורא עלילה על בני אדם׃
6 הפך ים ליבשה בנהר יעברו ברגל שם נשמחה בו׃
7 משל בגבורתו עולם עיניו בגוים תצפינה הסוררים אל ירימו למו סלה׃
8 ברכו עמים אלהינו והשמיעו קול תהלתו׃
9 השם נפשנו בחיים ולא נתן למוט רגלנו׃
10 כי בחנתנו אלהים צרפתנו כצרף כסף׃
