1 למנצח מזמור לדוד שיר לך דמיה תהלה אלהים בציון ולך ישלם נדר׃
2 שמע תפלה עדיך כל בשר יבאו׃
3 דברי עונת גברו מני פשעינו אתה תכפרם׃
4 אשרי תבחר ותקרב ישכן חצריך נשבעה בטוב ביתך קדש היכלך׃
5 נוראות בצדק תעננו אלהי ישענו מבטח כל קצוי ארץ וים רחקים׃
6 מכין הרים בכחו נאזר בגבורה׃
7 משביח שאון ימים שאון גליהם והמון לאמים׃
8 וייראו ישבי קצות מאותתיך מוצאי בקר וערב תרנין׃
9 פקדת הארץ ותשקקה רבת תעשרנה פלג אלהים מלא מים תכין דגנם כי כן תכינה׃
