6 נעויתי שחתי עד מאד כל היום קדר הלכתי׃
7 כי כסלי מלאו נקלה ואין מתם בבשרי׃
8 נפוגותי ונדכיתי עד מאד שאגתי מנהמת לבי׃
9 אדני נגדך כל תאותי ואנחתי ממך לא נסתרה׃
10 לבי סחרחר עזבני כחי ואור עיני גם הם אין אתי׃
11 אהבי ורעי מנגד נגעי יעמדו וקרובי מרחק עמדו׃
12 וינקשו מבקשי נפשי ודרשי רעתי דברו הוות ומרמות כל היום יהגו׃
13 ואני כחרש לא אשמע וכאלם לא יפתח פיו׃
14 ואהי כאיש אשר לא שמע ואין בפיו תוכחות׃
15 כי לך יהוה הוחלתי אתה תענה אדני אלהי׃
16 כי אמרתי פן ישמחו לי במוט רגלי עלי הגדילו׃
