5 יהיו כמץ לפני רוח ומלאך יהוה דוחה׃
6 יהי דרכם חשך וחלקלקות ומלאך יהוה רדפם׃
7 כי חנם טמנו לי שחת רשתם חנם חפרו לנפשי׃
8 תבואהו שואה לא ידע ורשתו אשר טמן תלכדו בשואה יפל בה׃
9 ונפשי תגיל ביהוה תשיש בישועתו׃
10 כל עצמותי תאמרנה יהוה מי כמוך מציל עני מחזק ממנו ועני ואביון מגזלו׃
11 יקומון עדי חמס אשר לא ידעתי ישאלוני׃
12 ישלמוני רעה תחת טובה שכול לנפשי׃
13 ואני בחלותם לבושי שק עניתי בצום נפשי ותפלתי על חיקי תשוב׃
14 כרע כאח לי התהלכתי כאבל אם קדר שחותי׃
15 ובצלעי שמחו ונאספו נאספו עלי נכים ולא ידעתי קרעו ולא דמו׃
16 בחנפי לעגי מעוג חרק עלי שנימו׃
17 אדני כמה תראה השיבה נפשי משאיהם מכפירים יחידתי׃
18 אודך בקהל רב בעם עצום אהללך׃
