14 ואני עליך בטחתי יהוה אמרתי אלהי אתה׃
15 בידך עתתי הצילני מיד אויבי ומרדפי׃
16 האירה פניך על עבדך הושיעני בחסדך׃
17 יהוה אל אבושה כי קראתיך יבשו רשעים ידמו לשאול׃
18 תאלמנה שפתי שקר הדברות על צדיק עתק בגאוה ובוז׃
19 מה רב טובך אשר צפנת ליראיך פעלת לחסים בך נגד בני אדם׃
20 תסתירם בסתר פניך מרכסי איש תצפנם בסכה מריב לשנות׃
21 ברוך יהוה כי הפליא חסדו לי בעיר מצור׃
22 ואני אמרתי בחפזי נגרזתי מנגד עיניך אכן שמעת קול תחנוני בשועי אליך׃
23 אהבו את יהוה כל חסידיו אמונים נצר יהוה ומשלם על יתר עשה גאוה׃
24 חזקו ויאמץ לבבכם כל המיחלים ליהוה׃
