4 וראיתי אני את כל עמל ואת כל כשרון המעשה כי היא קנאת איש מרעהו גם זה הבל ורעות רוח׃
5 הכסיל חבק את ידיו ואכל את בשרו׃
6 טוב מלא כף נחת ממלא חפנים עמל ורעות רוח׃
7 ושבתי אני ואראה הבל תחת השמש׃
8 יש אחד ואין שני גם בן ואח אין לו ואין קץ לכל עמלו גם עיניו לא תשבע עשר ולמי אני עמל ומחסר את נפשי מטובה גם זה הבל וענין רע הוא׃
9 טובים השנים מן האחד אשר יש להם שכר טוב בעמלם׃
10 כי אם יפלו האחד יקים את חברו ואילו האחד שיפול ואין שני להקימו׃
11 גם אם ישכבו שנים וחם להם ולאחד איך יחם׃
