1 לכל זמן ועת לכל חפץ תחת השמים׃
2 עת ללדת ועת למות עת לטעת ועת לעקור נטוע׃
3 עת להרוג ועת לרפוא עת לפרוץ ועת לבנות׃
4 עת לבכות ועת לשחוק עת ספוד ועת רקוד׃
5 עת להשליך אבנים ועת כנוס אבנים עת לחבוק ועת לרחק מחבק׃
6 עת לבקש ועת לאבד עת לשמור ועת להשליך׃
7 עת לקרוע ועת לתפור עת לחשות ועת לדבר׃
8 עת לאהב ועת לשנא עת מלחמה ועת שלום׃
9 מה יתרון העושה באשר הוא עמל׃
10 ראיתי את הענין אשר נתן אלהים לבני האדם לענות בו׃
11 את הכל עשה יפה בעתו גם את העלם נתן בלבם מבלי אשר לא ימצא האדם את המעשה אשר עשה האלהים מראש ועד סוף׃
12 ידעתי כי אין טוב בם כי אם לשמוח ולעשות טוב בחייו׃
13 וגם כל האדם שיאכל ושתה וראה טוב בכל עמלו מתת אלהים היא׃
14 ידעתי כי כל אשר יעשה האלהים הוא יהיה לעולם עליו אין להוסיף וממנו אין לגרע והאלהים עשה שיראו מלפניו׃
