5 קנה חכמה קנה בינה אל תשכח ואל תט מאמרי פי׃
6 אל תעזבה ותשמרך אהבה ותצרך׃
7 ראשית חכמה קנה חכמה ובכל קנינך קנה בינה׃
8 סלסלה ותרוממך תכבדך כי תחבקנה׃
9 תתן לראשך לוית חן עטרת תפארת תמגנך׃
10 שמע בני וקח אמרי וירבו לך שנות חיים׃
11 בדרך חכמה הרתיך הדרכתיך במעגלי ישר׃
12 בלכתך לא יצר צעדך ואם תרוץ לא תכשל׃
13 החזק במוסר אל תרף נצרה כי היא חייך׃
14 בארח רשעים אל תבא ואל תאשר בדרך רעים׃
15 פרעהו אל תעבר בו שטה מעליו ועבור׃
16 כי לא ישנו אם לא ירעו ונגזלה שנתם אם לא יכשולו׃
17 כי לחמו לחם רשע ויין חמסים ישתו׃
