15 כל ימי עני רעים וטוב לב משתה תמיד׃
16 טוב מעט ביראת יהוה מאוצר רב ומהומה בו׃
17 טוב ארחת ירק ואהבה שם משור אבוס ושנאה בו׃
18 איש חמה יגרה מדון וארך אפים ישקיט ריב׃
19 דרך עצל כמשכת חדק וארח ישרים סללה׃
20 בן חכם ישמח אב וכסיל אדם בוזה אמו׃
21 אולת שמחה לחסר לב ואיש תבונה יישר לכת׃
22 הפר מחשבות באין סוד וברב יועצים תקום׃
23 שמחה לאיש במענה פיו ודבר בעתו מה טוב׃
24 ארח חיים למעלה למשכיל למען סור משאול מטה׃
25 בית גאים יסח יהוה ויצב גבול אלמנה׃
26 תועבת יהוה מחשבות רע וטהרים אמרי נעם׃
27 עכר ביתו בוצע בצע ושונא מתנת יחיה׃
28 לב צדיק יהגה לענות ופי רשעים יביע רעות׃
29 רחוק יהוה מרשעים ותפלת צדיקים ישמע׃
