22 הלוא יתעו חרשי רע וחסד ואמת חרשי טוב׃
23 בכל עצב יהיה מותר ודבר שפתים אך למחסור׃
24 עטרת חכמים עשרם אולת כסילים אולת׃
25 מציל נפשות עד אמת ויפח כזבים מרמה׃
26 ביראת יהוה מבטח עז ולבניו יהיה מחסה׃
27 יראת יהוה מקור חיים לסור ממקשי מות׃
28 ברב עם הדרת מלך ובאפס לאם מחתת רזון׃
29 ארך אפים רב תבונה וקצר רוח מרים אולת׃
30 חיי בשרים לב מרפא ורקב עצמות קנאה׃
31 עשק דל חרף עשהו ומכבדו חנן אביון׃
32 ברעתו ידחה רשע וחסה במותו צדיק׃
33 בלב נבון תנוח חכמה ובקרב כסילים תודע׃
34 צדקה תרומם גוי וחסד לאמים חטאת׃
