10 בטוב צדיקים תעלץ קריה ובאבד רשעים רנה׃
11 בברכת ישרים תרום קרת ובפי רשעים תהרס׃
12 בז לרעהו חסר לב ואיש תבונות יחריש׃
13 הולך רכיל מגלה סוד ונאמן רוח מכסה דבר׃
14 באין תחבלות יפל עם ותשועה ברב יועץ׃
15 רע ירוע כי ערב זר ושנא תקעים בוטח׃
16 אשת חן תתמך כבוד ועריצים יתמכו עשר׃
17 גמל נפשו איש חסד ועכר שארו אכזרי׃
18 רשע עשה פעלת שקר וזרע צדקה שכר אמת׃
19 כן צדקה לחיים ומרדף רעה למותו׃
20 תועבת יהוה עקשי לב ורצונו תמימי דרך׃
21 יד ליד לא ינקה רע וזרע צדיקים נמלט׃
