22 וכפר עליו הכהן באיל האשם לפני יהוה על חטאתו אשר חטא ונסלח לו מחטאתו אשר חטא׃
23 וכי תבאו אל הארץ ונטעתם כל עץ מאכל וערלתם ערלתו את פריו שלש שנים יהיה לכם ערלים לא יאכל׃
24 ובשנה הרביעת יהיה כל פריו קדש הלולים ליהוה׃
25 ובשנה החמישת תאכלו את פריו להוסיף לכם תבואתו אני יהוה אלהיכם׃
26 לא תאכלו על הדם לא תנחשו ולא תעוננו׃
27 לא תקפו פאת ראשכם ולא תשחית את פאת זקנך׃
28 ושרט לנפש לא תתנו בבשרכם וכתבת קעקע לא תתנו בכם אני יהוה׃
29 אל תחלל את בתך להזנותה ולא תזנה הארץ ומלאה הארץ זמה׃
30 את שבתתי תשמרו ומקדשי תיראו אני יהוה׃
