36 וראהו הכהן והנה פשה הנתק בעור לא יבקר הכהן לשער הצהב טמא הוא׃
37 ואם בעיניו עמד הנתק ושער שחר צמח בו נרפא הנתק טהור הוא וטהרו הכהן׃
38 ואיש או אשה כי יהיה בעור בשרם בהרת בהרת לבנת׃
39 וראה הכהן והנה בעור בשרם בהרת כהות לבנת בהק הוא פרח בעור טהור הוא׃
40 ואיש כי ימרט ראשו קרח הוא טהור הוא׃
41 ואם מפאת פניו ימרט ראשו גבח הוא טהור הוא׃
42 וכי יהיה בקרחת או בגבחת נגע לבן אדמדם צרעת פרחת הוא בקרחתו או בגבחתו׃
43 וראה אתו הכהן והנה שאת הנגע לבנה אדמדמת בקרחתו או בגבחתו כמראה צרעת עור בשר׃
44 איש צרוע הוא טמא הוא טמא יטמאנו הכהן בראשו נגעו׃
45 והצרוע אשר בו הנגע בגדיו יהיו פרמים וראשו יהיה פרוע ועל שפם יעטה וטמא טמא יקרא׃
46 כל ימי אשר הנגע בו יטמא טמא הוא בדד ישב מחוץ למחנה מושבו׃
47 והבגד כי יהיה בו נגע צרעת בבגד צמר או בבגד פשתים׃
