4 No Anuture dâŋ manahuc tâpiri rune ere mu bararuŋ dâŋ hone manac ekopac; no mâreŋko fodapehape maŋʒâŋe‐nane tâcnewec noni hâcne ʒiŋuc mukopac:
5 O Jakobo, boze wiacge i biaŋne jâmbâŋ! O Israe, ŋeŋe tomage i aŋac ʒizine!
6 I wâneŋ qaratiekicne fokac iŋucne, â jufu gie opâ heririŋnao fokac irec sac, i ʒineaŋ saŋkarac âsu biaŋ Wofuŋzi sarawec iŋucne, â jâmâzâc jâc opâo domakac irec sâc.
7 Jambuŋ‐ticnezi ine opâ pake fusucmarâ qâmbâriŋkeekac irec sâc, â guec mâriri‐ticnezi opâ moc mi basaocmu. Ŋicwofuŋ‐ticne e ŋicwofuŋ Agagere sâc sirickeocmu â uucmaŋ‐ticnezi ferâ foocmu.
8 Aigita mâreŋkonec jowa wefuwec Anutu eki hâcne kâte bulimakaore ʒuŋe iŋucne tâpiri‐ticne erâ jukac. E ŋic gurune gurune râsifâc‐ticne imac‐jopa‐fârewec, ehuc siec wiac‐jeŋic henʒaŋ qanʒaŋne‐fârerâ tepe motec‐ticnezi muruc‐jopa‐fârewec.
9 E laioŋ ŋicne iŋucne wahawec fokac, erâ laioŋ ŋokacne irec sâc; mo ŋiczi sâcne suruckeocmu? Moc e go jambuŋguocmu e jambuŋkezo, â moc e go sâwecguocmu e wâc sâweckezo.”
10 Eme Balake e dâŋ i manarâ bune qâoriŋkeme Bileam me pocpoc qacnerâ ʒiŋuc âzâcnewec: “No râsifâc‐nane sâwec‐jopacte hefârecgupo, goki ine ware jambuŋ‐jopatec mi arec jahec â moc ezejec i!
11 Irec ʒi mâreŋgao wiserâ rac me! No ʒiŋuc hâcne gazapo: ‘No sâsecguhuc furine garepemu,’ ʒi ine Wofuŋzi mu hezuc egarekacte foocmu.”
12 Iŋuc mume Bileamzi ʒiŋuc âzâcnewec: “Kiŋaŋŋicfâcge sorec‐jopatec fâmbiŋ jaŋe ʒiŋuc jazapo i:
13 ‘Balake e ficticnao siliwa â gol fusucmarâ fokac i nare tahac eocmuo ine no sifu Wofuŋte dâŋ huckerâ nahacne maŋte wiac biaŋne me sâqocne moc mi epemu. Wofuŋzi dâŋ nazaocmu i sawa mupemu.’
14 No ʒi ŋicfâc‐nane jaŋerao risiepemu, irec ŋicguru ʒi jaŋe juku ʒâhec ŋicfâcge weniŋuc ejareniŋmu irec dâŋ gazape manac.”
15 Eme Bileam e jambuŋdâŋ‐ticne ʒuhuckerâ kecʒiŋuc muwec: “Bileam no Beorore ŋokâ, no ʒâŋe‐nane bâtâcnekicne.
