12 Iŋuc mume Bileamzi ʒiŋuc âzâcnewec: “Kiŋaŋŋicfâcge sorec‐jopatec fâmbiŋ jaŋe ʒiŋuc jazapo i:
13 ‘Balake e ficticnao siliwa â gol fusucmarâ fokac i nare tahac eocmuo ine no sifu Wofuŋte dâŋ huckerâ nahacne maŋte wiac biaŋne me sâqocne moc mi epemu. Wofuŋzi dâŋ nazaocmu i sawa mupemu.’
14 No ʒi ŋicfâc‐nane jaŋerao risiepemu, irec ŋicguru ʒi jaŋe juku ʒâhec ŋicfâcge weniŋuc ejareniŋmu irec dâŋ gazape manac.”
15 Eme Bileam e jambuŋdâŋ‐ticne ʒuhuckerâ kecʒiŋuc muwec: “Bileam no Beorore ŋokâ, no ʒâŋe‐nane bâtâcnekicne.
16 No Anuture dâŋ manahuc, Fekicne sâkore mamana biri kâuc mi baekopac. No tâpiri rune ere mu bararuŋ dâŋ hone manac ekopac, no mâreŋko fodapehape maŋʒâŋe‐nane tâcnewec noni hâcne ʒiŋuc mukopac:
17 Jakoboraonec bâpiŋ moc fuazokac, â Israe kikefuŋkonec ŋicwofuŋ moc fisizokac. E hâcne honezo ekopac, erâ ʒiŋuczia mâcne, e ʒoricko juhame erao ʒâŋe fipe rakac. E fuarâ Moabi ŋic qa imac ejareocmu, â Sefere ɋâricfâc jopa qâtâtiec ejareocmu.
18 E Edomŋic jaŋere mâreŋ ro rauc eocmu, â Seiri râsifâc‐ticne jaŋe wâc jowac roocmu. Israe ŋic jaŋe ine sanaŋkerâ juniŋmu.
19 Ŋicwofuŋ e Jakoboraonec fuarâ hae sâkoo soŋkerâ juraniŋmu jaŋe imac‐jopaocmu.”
20 Bileam e iŋuc murâ Amaleke ŋic honec‐joparâ dâŋticne ʒuhuckerâ kecʒiŋuc muwec: “Amaleke ŋiczi, ŋic gurune gurune jaŋere micne erâ jumbiŋ, jaŋe hâcne imac‐jopapie omaenʒoŋgopieŋ.”
21 Iŋuc murâ Keniŋic honec‐joparâ dâŋticne ʒuhuckerâ kecʒiŋuc muwec: “Fic hae‐ŋeŋic sanaŋne ŋerakac, â sareŋ‐ŋeŋic i qânâ faio râe rakicne.
22 Ehame Kaiŋte qâjâpecfâc ŋoŋe sifu omae‐fâreniŋmu. Manaŋgopieŋ, dameŋ mi ʒoraha Asihuru ŋic jaŋe kâpâcwâru bacŋopa raniŋmu.”
23 Iŋuc murâ dâŋticne ʒuhuckerâ ʒiŋuc muwec: “Jei, Anutuzi wiac i mume fuaha mozi sâcne juocmu?
24 Kitim mâreŋkonec ine woke wiac fisirâ Asihuru â Ebere ŋic imac‐jopaniŋmu wâc.”
