8 Uʒijazi Juda ŋicwofuŋ jume jara 38 eha Jeroboamte ŋokâ Ʒekariazi Israe ŋicwofuŋ ehuc mosa 6 Samaria haeo juwec.
9 Erâ e mamacfâc‐ticne jaŋe ejumbieŋ irec sâc jaha ehuc Wofuŋte ʒâŋe faio wiac mamakâcne ewec. Ehuc Nebate ŋokâ‐ticne Jeroboamzi Israe ŋic ejareme hehesic bâfuambiŋ i mi râpeckewec.
10 Ehame Jabesi ŋokâ‐ticne Salumzi râsi ecnehuc Ibeleam haeo qame hâmome tucticne qarâ ŋicwofuŋ juwec.
11 Eme Ʒekariazi wiac ebac ewec sasawa i Israe ŋicwofuŋ jaŋere Binaŋ Qâhâc papia qizecko qâreŋke‐fârekicne.
12 Wofuŋ e dâŋ ʒiŋuc muhuc Jehu mupaŋkecnewec i deŋke‐fârewec: “Ɋâricfâcge fua fepie arecne 4 eocmu jaŋe Israere eri ŋeŋeo ŋenʒoŋgopieŋ.”
13 Uʒija e Juda ŋicwofuŋ jume jara 39 eha Jabesi ŋokâ‐ticne Salumzi fuŋkerâ ŋicwofuŋ ehuc Samaria haeo mosa mocjaha juwec.
14 Ehame Gadi ŋokâ‐ticne Menahemzi Tiriza haeonec Samaria haeo fisirâ Jabesi ŋokâ‐ticne Salum qâhâmohuc tucticne qarâ ŋicwofuŋ ewec.
15 Eme Salumzi wiac ebac ewec â râsi fisiwec i sasawa Israe ŋicwofuŋ jaŋere Binaŋ Qâhâc papia qizecko qâreŋke‐fârekicne.
16 Eme Menahemzi Tapua hae â maŋnao wiac sasawa fowec i mecne erâ rârec rârec mâreŋ forawec i mâmâc imacke‐fârewec. Jaŋe haesac motâc mi rocnembiŋte iŋuc hâcne ewec. Erâ ŋokac kiwechec jaŋe sâqezi bujeŋic âke ropiewec.
17 Uʒija e Juda ŋicwofuŋ jume jara 39 eha Gadi ŋokâ‐ticne Menahemzi fuŋkerâ ŋicwofuŋ ehuc jara 10 Samaria haeo Israe ŋic jaŋere ŋicwofuŋ ewec.
18 Ehuc Wofuŋte ʒâŋe faio wiac mamakâcne ewec. Erâ e juwec sâc Nebatere ŋokâ Jeroboamzi Israe ŋic ejareme hehesic bâfuambiŋ i mi râpeckewec.
19 Ehame Asiria ŋicwofuŋ Pulizi Israe mâreŋko râsi fisiwec. Fisime Menahemzi ʒiŋuc manasuhuc siliwa moneŋ ŋemâc‐ticne 1 tauseŋ râcnewec: Eki baficnume Israe ŋicwofuŋ jusanaŋkezepac.
20 Erâ Menahem e moneŋ i sasawa Asiria ŋicwofuŋ râcneocte Israe ŋic moneŋ mafa sâkohec jaŋeraonec ŋic buc buc siliwa moneŋ ŋemâc‐ticne 50 sasawa jowac rowec. Irec Siria ŋicwofuŋ e mâreŋ ira mi juhuc risierâ rawec.
21 Eme Menahemzi wiac sasawa ebac ewec i Israe ŋicwofuŋ jaŋere Binaŋ Qâhâc papia qizecko qâreŋke‐fârekicne.
22 Juku Menahem e apa ŋosafâc‐ticne jaŋerao ʒuhuckerâ hâmome ŋokâ‐ticne Pekajazi tucticne qarâ ŋicwofuŋ juwec.
23 Uʒija e Juda ŋicwofuŋ jume jara 50 eha Menahemte ŋokâ Pekajazi fuŋkerâ Israe ŋicwofuŋ ehuc Samaria haeo jara jajahec juwec.
24 Ehuc Wofuŋte ʒâŋe faio wiac mamakâcne ewec. Erâ Nebate ŋokâ‐ticne Jeroboamzi Israe ŋic ejareme hehesic bâfuambiŋ, i mi râpeckewec.
25 Ehame momorifâcne jaŋere micne Peka, Remaliare ŋokâ hâcne, e Gileade ŋic 50 jaŋe bafickepie Samaria haeoa ŋicwofuŋ fic sacsanaŋ‐ticnehec ira Pekaja qâhâmorâ ekizia moc tucticne qarâ ŋicwofuŋ ewec.
26 Eme Pekajazi wiac sasawa ebac ewec i Israe ŋicwofuŋ jaŋere Binaŋ Qâhâc papia qizecko qâreŋke‐fârekicne.
27 Uʒija Juda ŋicwofuŋ jume jara 52 eha Remaliare ŋokâ Pekazi fuŋkerâ Samaria haeo Israe ŋicwofuŋ juhame jara 20 tarawec.
28 Ehuc Wofuŋte ʒâŋe faio wiac mamakâcne ewec. Erâ Nebatere ŋokâ Jeroboamzi Israe ŋic ejareme hehesic bâfuambiŋ i mi râpeckewec.
29 Ehame Israe ŋicwofuŋ Pekare dameŋko Asiria ŋicwofuŋ Tigela‐Pilesezi fisirâ ljoŋ â Abe‐Bete‐Maka â Janoa â Kedesi â Hazoro â Gileade hae â Galilaia mâreŋ, erâ Naftali mâreŋ sasawa i raucke‐fârewec. Ehuc ŋic ŋokac rocjoparâ Siria mâreŋko kâpâcwâru bacjopa rawec.
30 Ehame Uʒijare ŋokâ Jotam e ŋicwofuŋ jume jara 20 eha Ela ŋokâ‐ticne Hoseazi Remaliare ŋokâ Peka râsi ecnehuc qâhâmorâ tucticne qarâ ŋicwofuŋ ewec.
31 Eme Pekazi wiac sasawa ebac ewec i Israe ŋicwofuŋ jaŋere Binaŋ Qâhâc papia qizecko qâreŋke‐fârekicne.
32 Remaliare ŋokâ Peka e Israe ŋicwofuŋ jume jara jajahec eha Juda ŋicwofuŋ Uʒijare ŋokâ Jotamzi fuŋkerâ ŋicwofuŋ ewec.
33 E jara 25 bazurâ fuŋkerâ ŋicwofuŋ ehuc Jerusalem haeo jara 16 juwec. Neŋgoc‐ticne ʒâŋene Jerusa e Zadokore otâ.
34 Jotam e mamac‐ticne Uʒija ere sâcko Wofuŋte ʒâŋe faio wiac sasawa ebac eme sâcke‐fârewec.
35 Furu mâreŋ ine mi bârârie‐fârewec, irec ŋic ŋokac jaŋe mâreŋ iŋucnao taha bâzi â hosâc âsu rikehuc jumbiŋ jaha. Eme Jotamzi hâcne Wofuŋte ufuŋ irec motâc faicpec fowec i bawec.
36 Jotamzi wiac sasawa ebac ewec i Juda ŋicwofuŋ jaŋere Binaŋ Qâhâc papia qizecko qâreŋke‐fârekicne.
