30 Kiŋaŋŋicge no me Israe ŋicfâcge nâŋe fic ʒira wâsicgupene goki faic sambâŋko ŋeŋe haegao juhuc nunumu‐nâŋec manarâ aki anonoc enârezemec.
31 “Ŋic moczi âgo‐ticnerao bahac ŋemâcne bâfuame âgonezi mumupaŋ dâŋ muocte fânoc hecneme fic ʒira alatagere maŋfuŋko mumupaŋ dâŋ i muocte fisiocmuo
32 ine goki faic sambâŋko juhuc dâŋjekic manarâ kiŋaŋŋic jahecge jahere mumutara gie bahuc ŋic hehesicne eebapa‐ticnere sâcko okacne râcnezemec â bahacmâc juwec e ine tiŋne juju‐ticnere sâcko akickezemec.
33 “Israe ŋicfâcge jaŋe hehesic juhuc bugao bahapie go râsifâc‐jeŋic mana‐jaretec bawahac‐jopapie jaŋe maŋjeŋic bârisiehuc gorao risierâ ʒâŋege mutaniŋkehuc fic ʒira numu hefârec egareniŋmuo
34 goki faic sambâŋko juhuc dâŋjeŋic manarâ sâqocne‐jeŋic mutâmire‐jarehuc kâcɋenefâc‐jeŋic mâreŋ jaremeŋ ira mocwâc râec‐jopazemec.
35 “Jaŋe hehesic juhuc bugao bahapie goki sambâŋte motâc hetec hoe mi hehe mâc foocmu, eme goki bâtiŋ‐jopakomecte fic ʒira ʒâŋege mutaniŋkehuc sâqocne‐jeŋic beherâ nunumu gie baniŋmuo
36 goki faic sambâŋko juhuc dâŋjeŋic manarâ kiŋaŋŋicge no â ŋicfâcge Israe nâŋere sâqocne mutâmirehuc mutec ŋicfâcge mâreŋ‐jeŋic biŋe qajaremeŋ ira hoe hezejec. Go iŋuc ehuc hata biaŋne âte raniŋte qazu‐jareekic hâcne.
37 “Eme mâreŋ‐nâŋecko roroc me huc mimicne moc fuaocmu me nânâzi gieo hâmo qanʒaraŋ eocmu me hâpic me qokic guru sâko fisiniŋmu, me râsifâc‐nâŋec jaŋe fisirâ hae‐nâŋec moc somâ baniŋmu me wiac hâhâwicne me hucsâko moc fuaocmu
38 me wiac hâhâwicnezi ru sâc buʒâic bâfua‐nâreme ŋic izi me izi me Israe ŋicfâcge sasawa nâŋe numu hefârec egarehuc fic ʒira menâŋec nunumuo sicne‐garenaŋmuo
39 goki faic sambâŋko ŋeŋe haegao juhuc aki anonoc enârerâ ru sâc eebapa‐nâŋecte sâcko wiac enârezemec. Goki bucge mâreŋ ŋic sasawa maŋjeŋic hone taraekiczi maŋnâŋec honeekic wâc.
40 Irec erâ nâŋe kâcɋenefâc‐nâŋec mâreŋ tahac‐jopameŋ ira jufenaŋmu sâc araŋ bagarehuc junʒepeneŋ.
41 “Eme ŋic jaŋe ʒâŋe sâkoge â tâpiri ɋuŋɋasaŋgere biŋe mananiŋmu;
42 ehame ŋic furune moc, Israe ŋicfâcge nâŋere guruo mi fuakicnezi mâreŋ ʒorickonec ʒâŋe biŋegere ehuc fisirâ fic ʒira nunumu gie baocmu
43 ine goki faic sambâŋko ŋeŋe haegao juhuc dâŋticne manarâ wiac irec me irec numu‐gareme manacnezemec. Go iŋuc etec ŋic gurune gurune mâreŋ sâc juraŋgopieŋ jaŋe ʒâŋe biŋege manarâ Israe ŋicfâcge nâŋe araŋ bagareeŋgopeneŋ irec sâc jaha araŋ bagarehuc ʒiŋuc mananʒepieŋ: Fic bagarepo ʒira ʒâŋe biŋege fokac.
44 “Eme go ŋicfâcge ira me ira sorec‐nâpotec râsifâc‐nâŋec jopanaŋte ʒikao rahuc hae sâko ʒi bâwosâemeŋ â ʒâŋe biŋege fuaocte fic bagarepo ʒirapec ʒâŋe fihuc gorao nunumu gie banaŋmuo
45 goki faic sambâŋko juhuc numu hefârec dâŋnâŋec manarâ dopec‐nâpozemec.
46 “Ŋic moczi hehesic tâmiric moc mi jukac, irec nâŋe hehesic moc bâfuarâ bugao banaŋmu ine goki aaric manahuc râsifâc‐nâŋec jaŋere meo râec‐nâpotec jaŋe mâreŋ‐jeŋic bembeŋko me ʒoricko fokac ira kâpâcwâruo bacnâpo raniŋmu.
47 Eme nâŋe kâpâcwâruo râec‐nâpombiŋ mâreŋ ira maŋnâŋec bârisiehuc gorao risierâ numu hefârec egarehuc ʒiŋuc munaŋmu: ‘Nâŋe sâqorehuc sindaŋ â hehesic bâfuambeŋ.’
48 Nâŋe iŋuc muhuc gorao risierâ râsifâc‐nâŋec kâpâcwâruo bacnâpo rambiŋ mâreŋ ira maŋ qâqâtâc‐nâŋec furu jaha gorao râehuc mâreŋ‐nâŋec kâcɋenefâc‐nâŋec tahac‐jopameŋ erâ hae sâko bâwosâemeŋ erâ ʒâŋe biŋege fuaocte fic bagarepo ʒirapec ʒâŋe fihuc nunumu gie gorao banaŋmuo
49 goki faic sambâŋko ŋeŋe haegao juhuc numu hefârec dâŋnâŋec manarâ dopec‐nâpozemec.
50 Erâ hehesic â qaqatara bâfuarâ bugao bambeŋ i mutâmire‐nâre‐fârerâ kâpâcwâru bacnâpombiŋ jaŋe ejaretec busâqoc mana‐nârenʒepieŋ.
51 Wemocte, nâŋe gore ŋicfâc â biŋefâcge juŋgopeneŋ irec. Go Aigita mâreŋko aeŋ ʒocbâruŋ irec sâc ʒâic serereŋ maŋnao jumbeŋkonec bawefuc‐nâpomeŋ;
52 irec kiŋaŋŋicge â ŋicfâcge nâŋe numu hefârec egarepene sâc nâŋerao ʒâŋe fihuc mana‐nârezemec.
53 O Wofuŋ Anutu, goki hâcne ŋic gurune gurune mâreŋ sâc juraŋgopieŋ jaŋeraonec bâtâc bacnâporâ biŋefâcge bacnâpomeŋ; go kâcɋenefâc‐nâŋec Aigita mâreŋkonec bawefuc‐jopahuc kiŋaŋŋicge Mosere micko dâŋ râemeŋ irec sâcko wiac efâremeŋ hâcne.”
54 Eme Salomo e Wofuŋte alata irec maŋfuŋko dieŋzi herâ meticne sambâŋkopec bâfeŋnehuc Wofuŋ numu hefârec ecnekume tarame faharewec.
55 Fahare domahuc Israe kikefuŋ sasawa dâŋ marac sâkoo kecʒiŋuc muhuc jambuŋ‐jopawec:
56 “Wofuŋzi Israe ŋicfâc‐ticne nâŋâc dâŋ mupaŋke‐nârewec irec sâc jujuhâmo bâfua‐nârewec e mumbiaŋkezo! Eki hâcne kiŋaŋŋic‐ticne Mose ecneme findaŋdâŋ biaŋne mufua rawec irecnec dâŋ moc waha qahuc fârimâc mi ewec.
57 Wofuŋ Anutu‐nâŋec e mamacfâc‐nâŋec jaŋehec juwec irec sâcko nâŋâcnehec juzejec wâc, e behec‐nâporâ mi râpec‐nâpozejec.
58 Eki maŋnâŋecte guriŋ baha erao domazejec. Ehame hata‐ticnao jufârehuc mamacfâc‐nâŋec sâcmutâc, dâŋsanaŋ â mumutâc dâŋ wiac jarewec i mana rereŋ enʒepeneŋ.
59 Eme no Wofuŋ mu wâwâsic ecnekopac dâŋ ʒizi Wofuŋ Anutu‐nâŋec ere maŋfuŋko ŋafe ʒoaŋ sâc fozejec. Ehame e kiŋaŋŋic â Israe ŋicfâc‐ticne ŋafe ʒoaŋ sâc bafic‐nâpohuc dâŋnâŋec mutarazejec.
60 Iŋuc enâreme ŋic gurune gurune mâreŋ sâc juraŋgopieŋ jaŋe ʒiŋuc mana taranʒepieŋ: Wofuŋ e Anutu fârine jukac. Erao ʒuhuckerâ Anutu moc mi jujâmbâŋkekac.
