Zozuwe 18:1-7

¹Izelayɛle nuiti ti zooi zogai ma, ti maaɠolo, ti ɠaalɛɛni ba Silo. Ti GALA daaɠomi seɠe ʋɛlɛi loni ná.

²Boloda lɔfela ɠa é yɛni Izelayɛle nuiti saama, niiti ti la ɠɛni dɛ tɔnɔi zɔlɔɔni.

³Zozuwe ɠɛni naazu Izelayɛle nuiti ma: «Yeeɠɛɠala lielegɔ ɠa dɛ wo kɛɛzu faalakobai zu, wo ʋa li, wo ʋa zooi zeɠe ga wɔnɔ, nii Ɠɔoɠɔ GALAGI, wo-mɛmɛwolani ta-ƓALAGI feai wo ʋɛ?

⁴À yeelo zunu saʋagɔ ʋa bolodai ɠilagilagi zu, nà ti leʋesu ada. Ta wuzeɠezu, ti zooi zuɓizɛ, ti ta-wolodamai nɔnɔi ʋɛtɛ, ti ná-fai zɛʋɛ, ti ʋaa la pɔ̀ bɛ.

⁵Ta kɛɛzu su lɔfela, ti gaaɠwɛ ɓɔɠɔ ʋa. Zuda ɠa yɛsu ná-kwɛpelemaʋɛ, lɛkpɛmaʋɛ nu yeezazuʋɛ. Zozɛfe ná-pɛlɛyeɠei ɠa yɛsu ná-kwɛpelemaʋɛ, lɛkpɛmaʋɛ nu ɠɔʋɛzuʋɛ.

⁶Wa zooi ɠaaɠwɛɛzu su lɔfela, wo ʋa ʋɛ pɔ̀ ga ma zɛʋɛi. Nà kpakutoomai ɠɛɛzu wo ʋɛ, ʋɛ nɔ Ɠɔoɠɔ GALAGI da-ƓALAGI ɠaazu.

⁷Kɛlɛ Leevi mavofodai la zou nɔpɛ sɔlɔɔga ga nɔnɔ wo zaama, mazɔlɔɔ Ɠɔoɠɔ GALAGI ná-zalaɠa ɠula vai ɠa é ga tɔnɔi. Nii é ga Gade ná-bolodai, ta Luɓɛn ná-bolodai, ta Manasee ná-bolodai ɠilazuʋɛ, naati ti tɔnɔi zɔlɔɔgɛ na, Zuludɛn ʋolu ʋelei, folo ɠulazu ʋelei, nii Moize, Ɠɔoɠɔ GALAGI ná-botiɠɛ nui feeni ti ya.»