Zozuwe 10:1-37

¹Zeeluzalɛme masagi Adɔni-Seedɛke mɛnini ga Zozuwe taai zoga, nii é ga Ayi, é koloɠolo mɛtu, nii é kɛɛni ga Zeeliko taai ta ná-masagi, naa ɠɛɠalai ɠa é kɛɛni ga Ayi ta ná-masagi. É mɛnini ɓalaa ga Gaɓaɠɔn nuiti ti yɔɠɔzuɓɛtɛni ta Izelayɛle nuiti, ta zeini ti zaama.

²É wola luani, mazɔlɔɔ Gaɓaɠɔn ɠɛni ga taa ɓiin gola, eɠɛʋelei nɔ masa taaiti ti la, é wɔɔlɔni Ayi ʋa, naa ʋɛɛ, zunuiti kpein ti ɠɛni ga kɔɔɠɔ nu ɠɛzɛɠɛzɛgiti.

³Naa ɠa é kɛɛni, Zeeluzalɛme masagi Adɔni-Seedɛke keelaiti teʋeni Ɠeeɓelɔn masagi Ɠɔɠame ma, ta Yaalemute masagi Pileyame, ta Lakise masagi Yafia, ta Egelon masagi Deɓiil, ga é wo ti ma ga:

⁴«À ʋa, wo yeeve bɛ̀, ade Gaɓaɠɔn zakpe, tɔɔzei ná-nuiti ti ziilɛi minazeɠegi woga yɔɠɔzu ta Zozuwe, ta Izelayɛle nuiti.»

⁵Naa ɠa é kɛɛni, Amɔɔl nuiti ta-masa dɔɔlugɔiti, ti woolaani ma, Zeeluzalɛme gelei, ta Ɠeeɓelɔn gelei, ta Yaalemute gelei, ta Lakise gelei, ta Egelon gelei, ti lo ta-zalaʋusuiti untuɠɔ, ti li Gaɓaɠɔn laalɔɠɔma. Ti Gaɓaɠɔn zeini kɛlɛ su, ti laalɛ taai wu.

⁶Gaɓaɠɔn nuiti ti keelaiti teʋeni Zozuwe ma ti-ʋuuzuʋɛ Gilegale, ti ɠɛ ma: «Mina ɠɛlɛ ɗa-wotiɠɛ nuiti gi ʋa. Ʋa fala, è ɓɔ gi ʋa, è gi ɠizo, mazɔlɔɔ Amɔɔl nuiti ta-masagiti ti zeini gize yooi zu, ti yeezoga, ti ʋa gi laalɔɠɔma.»

⁷Zozuwe ta kɔɔɠɔ nuiti kpein ti lɛɛni, ti zeɠe Gilegale, ta ná-kɔɔɠɔ nu ɠɛzɛɠɛzɛgiti.

⁸Ɠɔoɠɔ GALAGI ɠɛni Zozuwe ma: «Mina lua naama masagiti ba, mazɔlɔɔ gè zobogi vea è ʋɛ, è vɔni ti ma, ti taɠila kpalaa ge la zooga é ʋa è zakpe.»

⁹Zozuwe ɲiini piin ziɛzu, é zo Gilegale. É ɠulani ti viliba, é loo ti ma.

¹⁰Ɠɔoɠɔ GALAGI ti zuvazani Izelayɛle nuiti tuɠɔ, kɔɔi ɠoloɠoloni ti ya Gaɓaɠɔn ɠakalaʋɛ. Izelayɛle nuiti ti pilɛ sɔlɔɔni ti ma, ti ʋilɛ ti ʋolu pelei zu, é lɛɛzu gize yɔɠɔzuʋɛ Ɓɛte-Ɠɔlon, eyɛsu ti zeeli Azeeka ta Makeeda.

¹¹Siɛgi zu Amɔɔl nuiti ti ɠɛni ʋelazu la Izelayɛle nuiti ba, ti ɗa yei ga pelei, é gize yɔɠɔzuʋɛ Ɓɛte-Ɠɔlon, Ɠɔoɠɔ GALAGI sakɔtu wolai yeini ti ma, é zeɠe geezuʋɛ, é ɗa ʋu ti ma, eyɛsu é zeeli Azeeka. Naa nui wola ʋaani, é leʋe Izelayɛle nuiti ta-nu ʋaai ʋa ga boɠa zɔkpɔi.

¹²Naama volo ná, Zozuwe wooɠulani Ɠɔoɠɔ GALAGI ma, yeei Ɠɔoɠɔ GALAGI feeni la Izelayɛle nuiti bɛ ga ti pilɛ sɔlɔɔ Amɔɔl nuiti ma. Zozuwe wooɠulani Izelayɛle nuiti kpein gaazu, é ɠɛ: «Foloi, lo kpɛ Gaɓaɠɔn maazuʋɛ! Alugi, lo Ayalon nɛmɛi maazuʋɛ!»

¹³Foloi loni, é la ɲiikpini. Alugi ɓalaa loni, eyɛsu nuɓusɛiti ti potokulai ɠɛ ti zili nuiti ma. Naa zɛʋɛʋɛ «Telebo nui ná-sɛʋɛi» zu. Foloi loni, é tɛai ma, é la daani eyɛsu folo ɠila kpalain.

¹⁴Folo ɠila kpalaa ge la dɛ ɠɛɛni ga naama voloi ɠɛʋele, naa luɠɔ ɓaa naa ʋoluma, ga Ɠɔoɠɔ GALAGI ʋa woilo nui woo ma ɠana, mazɔlɔɔ Ɠɔoɠɔ GALAGI ɠa é ɠɛni kɔɔi ɠɔɔzu Izelayɛle nuiti bɛ.

¹⁵Zozuwe ta Izelayɛle nuiti kpein ti ɠaleni ma ti-ʋuuzuʋɛ Gilegale.

¹⁶Masa dɔɔlugɔi naati ti ʋelani, ti lɔɔɠu Makeeda, pugi zu.

¹⁷Nui tanigaani ti Zozuwe ɠobavaawoni, ti ɠɛ ma: «Masa dɔɔlugɔiti dɔɔɠuʋɛ Makeeda, pugi zu.»

¹⁸Zozuwe ɠɛni ma: «À kɔtu wolaiti kilikili, wo da pugi laaʋɛ, wo zunuiti sei ná, ti naa makɛ.

¹⁹Wɔun wa, à mina looɠo, à ʋilɛ wo zili nuiti polu, à pele leʋe ti luɠɔ, ti mina lɛ ta-laazuʋɛti, mazɔlɔɔ Ɠɔoɠɔ GALAGI wa-ƓALAGI ti lɔa wo yeezu.»

²⁰Zozuwe ta Izelayɛle nuiti ti ɓeni ga yeezeeli ti ma, nágo ti ʋa ti-ma zuwu ɠaaleʋe, kɛni pela geleiti nɔ, niiti ti liini ta-laaiti su, niiti siɠigi ti ma.

²¹Naa ʋolu, nuɓusɛiti kpein gaazɔlegai ʋaani ga pagɔ ti-ʋuuzuʋɛ, Zozuwe ʋɔ bɛ, Makeeda. Naa ʋoluma, ma yooi kpein su, nu nɔpɛ ge la mɔ ɠɛni ɓɔɛzu Izelayɛle nuiti daalɔɠɔma.

²²Zozuwe ɠɛni ti ma: «À pugi laalao, wo masa dɔɔlugɔiti kula su, wo ʋa ga tiye pɔ̀.»

²³Zekana ti kɛɛni la, ti masa dɔɔlugɔiti kulani pugi zu, ti li ga tiye pɔ, Zeeluzalɛme masagi, Ɠeeɓelɔn masagi, ta Yaalemute masagi, naa ʋɛɛ Lakise masagi ʋa, ta Egelon masagi.

²⁴Siɛgi zu ti masagi naati kulani la, ti ʋa ga tiye Zozuwe ʋɔ, Zozuwe Izelayɛle zunuiti kpein tolini, ta kɔɔɠɔ nu ɠundiɠiiti niiti ti ɓɔni ba kɔɔɠɔzuʋɛ, é ɠɛ ti ma: «À maaɓuɠa bà, wo ɠɔɠɔlo masagi niiti kɔda.» Ti maaɓuɠani ba, ti ɠɔɠɔlo ti-ɠɔdaʋɛti.

²⁵Zozuwe ɠɛni ti ma: «À mina lua, wo zasu mina ɓali. À yiilɔɔ, wo zɛbɛzeɠe, mazɔlɔɔ ʋele ɠana Ɠɔoɠɔ GALAGI wo zili nuiti sosu da, niiti wo ʋaazu ti zakpesu.»

²⁶Naa ʋoluma, Zozuwe ti ʋaani, é ti zɛlɛ gulu lɔɔlugɔiti ba. Ti yɛni zɛlɛni ná eyɛsu kpɔkɔi.

²⁷Foloi daa ziɛgi zu, Zozuwe devei veeni, ga ti ti-ma ʋoomaiti kula guluiti ba, ti ti ʋili ya pugi zu, ʋɛ masagiti ti lɔɔɠuni ná. Naa ʋoluma, ti daaɠulu ga kɔtu wolaiti. Naati ta ná zaaɠaza.

²⁸Zozuwe Makeeda zoni naama voloi nɔ. É taa ʋeaiti kpein suwuɠaaleʋeni ta ta-masagi, é la ɠɛni gila kpalaa zɛni vulua. É Makeeda masagi zoni, eɠɛʋelei é Zeeliko masagi zoni da.

²⁹Zozuwe ta Izelayɛle nuiti ti zeɠeni Makeeda, ti li Liɓena, ti laalɛ bu.

³⁰Ɠɔoɠɔ GALAGI taai naa ta taa masagi lɔɔni Izelayɛle nuiti zeezu. Ti taa ʋeaiti kpein suwuɠaaleʋeni, ti la gila kpalaa zɛni vulua. Zozuwe ma masagi zoni, eɠɛʋelei é Zeeliko masagi zoni da.

³¹Zozuwe ta Izelayɛle nuiti ti zeɠeni Liɓena, ti li Lakise. Ti seini kɛlɛ su, ti laalɛ bu.

³²Ɠɔoɠɔ GALAGI Lakise lɔɔni ti yeezu, ti naa zoni foloi velesiɛi. Ti taa ʋeaiti kpein suwuɠaaleʋe, niiti ti ɠɛni ná, eɠɛʋelei ti kɛɛni la ga Liɓena.

³³Geezɛɛl masagi Ɠɔɔlame ʋaani Lakise maalobosu. Kɛlɛ Zozuwe vɔnini ma, ta ná-nuɓusɛiti, é la gila kpalaa zɛni vulua.

³⁴Zozuwe ta Izelayɛle nuiti ti zeɠeni Lakise, ti li Egelon. Ti seini kɛlɛ su, ti laalɛ bu.

³⁵Ti soni ma volo ɠilagi nɔ. Ti taa ʋeaiti kpein suwuɠaaleʋeni, niiti ti ɠɛni ná. Zozuwe ná zuɠoloɠoloni ma yee nɔ, eɠɛʋelei é kɛɛni la ga Lakise.

³⁶Zozuwe ta Izelayɛle nuiti ti zeɠeni Egelon, ti li Ɠeeɓelɔn, ti laalɛ bu.

³⁷Ti taai zoni, ti masagi ta nuɓusɛiti pɛ suwuɠaaleʋe, ta taa goiti ti ɠɛni ba, naati su nuɓusɛiti, eɠɛʋelei ti kɛɛni la ga Egelon. Zozuwe taai ɠoloɠoloni mɛtu, é la ɠɛni nu ɠila kpalaa zɛni vulua.