Zone 6:28-50

²⁸Ke nanasa la ia rini si Asa, “Na sa si kaqu tavetia gami, pude boka tavetia sapu gua hiva nia sa Tamasa?”

²⁹Meke olaṉa se Zisu “Sapu hiva nia Tamasa pude tavetia gamu, si mi va hinokaria mo si Asa sapu ta garununa koa Sa.”

³⁰Ke olaṉa la ia rini si Asa, “Na tinavete variva magasana sa si kaqu tavetia Goi koa gami pude mami dogoria, meke va hinokarigo? Ego, na sa si kaqu tavetia Goi?

³¹Sari tiatamada si hena ia sa mana pa qega, gua sapu koa pa Kinubekubere Hope, ‘Poni ni Sa sari na bereti sapu mae guadi pa Maṉauru pude di henai,’ gua.”

³²Meke zama se Zisu, “Maqu tozi va hinokarani gamu, lopu e Mosese si ponini gamu sa bereti hinokara sapu gore mae guana pa Maṉauru, ba sa Tamaqu tu si vari poni nia koa gamu sa bereti hinokara sapu gore mae guana pa Maṉauru.

³³Sa bereti sapu vari poni nia Tamasa koari na tie, si Asa tugo sapu gore mae guana pa Maṉauru, sapu ponia sa tinoa koasa kasia popoa,” gua se Zisu.

³⁴Meke tepa la koa Sa si arini, “Baṉara, podalae kamahire mu ponini gami sa bereti asa.”

³⁵Meke zama la koa rini se Zisu, “Arau tugo sa bereti variva toa. Asa sapu mae koa Rau si lopu kaqu ovia, meke asa sapu va hinokarau si lopu kaqu memeha si asa.

³⁶Ba gua sapu ele tozini gamu tu Rau, sapu ele dogorau mia mo, ba korapa lopu va hinokarau tugo gamu.

³⁷Sari doduru pu poni Nau sa Tamaqu si kote mae koa Rau, meke namu lopu kote kilu pania Rau si keke arini.

³⁸Ura lopu gore mae si Arau pa Maṉauru pude lulia sa Qua hiniva soti, ba sa hiniva tu tanisa sapu garunuqu si Arau.

³⁹Meke hie sa hiniva tanisa sapu garunau, sapu lopu keke arini pu poni Au Sa si kote muliuṉu meke kaqu va toa pule betoi Rau sari doduru pa rane mumudi.

⁴⁰Ura sapu hiva nia sa Tamaqu koari doduru pu doṉo la koa sa Tuna meke va hinokaria, si pude kaqu tagoa rini sa tinoa hola, meke kaqu va toa pulei Rau si arini pa rane mumudi,” gua si Asa.

⁴¹Meke pa totoso asa si podalae qumiqumi nia rina tie si Asa, sina zama si Asa, “Arau tugo sa bereti sapu gore mae guana pa Maṉauru,” gua.

⁴²Ke zama si arini, “Lopu e Zisu tu sia, sapu sa tuna e Zosepa? Nake gilani nada mo sari na tiatamana. Ba na vegua ke zama nia tu Sa sapu na gore mae guana pa Maṉauru si Asa?” gua.

⁴³Meke olaṉi Zisu si arini, “Mi lopu qumiqumi golomo Nau.

⁴⁴Loke tie si boka mae koa Rau, be lopu ta turaṉa mae si asa koasa Tamaqu pu garunau, meke kaqu va toa pulea Rau si asa pa rane mumudi.

⁴⁵Ta kubere koasa Kinubekubere tadi na poropita si guahe: ‘Kote tava tumatumae beto koe Tamasa sari doduru tie,’ gua. Doduru pu avosia sa Tamaqu meke tava tumatumae koa Sa si mae koa Rau.

⁴⁶Loke tie si ele dogoro nia pa matana sa Tamaqu, ba telena mo Asa sapu gorena mae gua koe Tamasa si ele dogoro sotia si Asa.

⁴⁷Maqu tozi va hinokarani gamu, asa sapu va hinokara si ele tagoa sa sa tinoa hola.

⁴⁸Arau tugo sa bereti sapu variva toa.

⁴⁹Sari tiatamamia pukerane si hena ia sa mana pa korapa qega, ba mate tu si arini.

⁵⁰Ba sa bereti sapu gorena mae gua pa Maṉauru si votikaena, ke asa sapu hena ia sa bereti asa si lopu kaqu mate.