Zone 6:2-27

²Meke keke puku vinarigara lavata si luli mudi mae koa Sa, sina dogori rini sari tinavete variva magasadi, saripu taveti Sa koari na tie mohodi.

³Meke ene sage la pa keke toqere se Zisu, meke la habotu turaṉi Sa sari Nana disaepeli.

⁴Na ele tata sa Inevaṉa Pasova d.

⁵Meke sipu doṉo la se Zisu, si dogoria Sa sa vinarigara lavata sapu korapa ene mae koa Sa, ke nanasa la ia Sa se Pilipi, “Pavei si kote boka holu bereti gita pude poni sari doduru tie hire?”

⁶Zama guahe si Asa pude podekia se Pilipi gua, ura ele gilania Nana tu sapu gua kote tavetia Sa.

⁷Meke olaṉa se Pilipi, “Be guana hopeke vasidi hite mo si henai rini, ba kote hola nia tu sa tinabara tana keke tie pa vesu sidara padana sa hinoludi rina ginani,” gua si asa.

⁸Ba keke ri Nana disaepeli sapu e Aduru, sa tasina Saimone Pita, si zama,

⁹“Koa nana he si keke koreo sapu ka lima gana bereti meke karua gana igana. Ba ve kaqu gua pa soku tie sarini?” gua si asa.

¹⁰“Va haboti sari na tie,” gua se Zisu. Na vasina dudulina tugo sa vasina asa, ke habotu sari doduru tie. Ari ka lima tina sari vinarigaraedi si arini, ba lopu ta nae somanae sari na koburu na barikaleqe.

¹¹Meke vagi Zisu sari na bereti meke zama valeana ni Sa koe Tamasa, meke va hihia i Sa koari na tie pu habotudi vasina. Tavete guni tugo Sa sari na igana, meke deṉa zotaṉa beto sari doduru tie.

¹²Sipu ele deṉa sari doduru tie si zama la koari Nana disaepeli se Zisu, “Pudiki varigara ni sari na umumu ginani saripu koa hola, pude lopu ta oki palae hoboro,” gua si Asa.

¹³Ke gua asa si pudiki varigara ni rini, sari na umumu ginani pu hena tairi rina tie, meke va siṉi rini sari ka manege rua pili.

¹⁴Sipu dogoria rina tinoni sa tinavete variva magasana sana sapu tavetia Zisu, si zama sarini vasina, “Hinokara sapu hie tugo sa poropita sapu kaqu mae koasa kasia popoa,” gua si arini.

¹⁵Gilania Nana tu Zisu sapu kote mae tuqe ososo nia rini si Asa, pude va baṉaria gua, ke taluarae pule la telena koari na toqere si Asa.

¹⁶Meke sipu veluvelu sa popoa, si ene gore pule la pa kopi Qaleli sari na disaepeli te Zisu.

¹⁷Meke suraṉa pa keke koaka sarini meke karovo koasa koqu meke pule la pa Kepaniami. Boṉi mo sa popoa ba lopu ele kamo la koa rini se Zisu.

¹⁸Meke podalae hiru sa givusu, ke noma sa kolo.

¹⁹Ba sipu ka lima babe ka onomo kilomita seuna gua sapu qelua ri kasa disaepeli, si dogoria rini se Zisu korapa ene mae pa kolo, meke matagutu sisigiti si arini.

²⁰“Mi lopu matagutu, Arau mo!” gua se Zisu.

²¹Ke tiqe hiva suraṉia rini pa koaka si Asa. Sipu suraṉa tugo Sa, si hogoto mo si arini pa popoa sapu hiva la ia gua rini.

²²Pa koivugona pule si gilania sa puku tinoni lavata pu koa hola pa kalina sa kopi Qaleli sapu keke mo sa koaka sapu koana vasina, meke gilania tugo rini sapu lopu suraṉa luli vasina koari Nana disaepeli se Zisu ba koa hola Nana tu.

²³Ba kaiqa koaka saripu mae guadi pa vasileana Taberiasi, si mae hogoto tata koasa vasina pu mana ni Zisu sari na bereti, saripu henai rina kobi tinoni.

²⁴Meke totoso gilania sa puku tinoni lavata sapu lopu koa vasina se Zisu meke sari Nana disaepeli, si la suraṉa dia koari na koaka arini, meke karovo luli la pa Kepaniami, pude hata ia se Zisu, gua.

²⁵Meke sipu kamo rini pa kali karovona sa kopi si dogoria rini se Zisu vasina, ke nanasia rini si Asa, “Titisa, visoroi si mae goi tani?” gua si arini.

²⁶Meke olaṉa se Zisu, “Maqu tozi va hinokarani gamu, sapu gua hata Nau gamu, sina henai mo gamu sari na bereti, meke deṉa valeana mia, lopu koa gua sapu dogori gamu sari na Qua tinavete variva magasadi.

²⁷Mu lopu voriti sisigiti nia sa ginani sapu lopu sana kaleana, ba mi voriti nia tu sa ginani sapu lopu beto meke kamoa sa tinoa hola. Asa sa ginani sapu kaqu ponini gamu sa Tuna na Tie. Ura ele vata dogoro nia sa Tamasa pa Nana ṉiniraṉira sapu qetu Nau Sa si Rau.”