Zone 5:4-27

⁴Sina hoke gore mae koasa kopi sana sa mateana te Tamasa meke va nakilia sa sa kolo. Meke sa tie mohona pu kamo kekenu la koasa kopi, sipu nakili sa kolo sana si ta salaṉa sa nana minoho.

⁵Meke koa nana vasina si keke tie sapu ka toloṉavulu vesu vuaheni si koa moho si asa.

⁶Meke totoso dogoria Zisu si asa korapa eko nana vasina, meke tumae nia Sa sapu ele seunae hola sa nana minoho, si nanasia Sa, “Vegua, hiva ta salaṉa si goi?”

⁷Meke olaṉa sa tie mohona, “Baṉara, loke tie si koa pude toka nau gore la koasa kopi, totoso nakili sa kolo, pude korapa la gua rau, si keke votiki tie tu si gore va kenue la.”

⁸Ke zama la ia Zisu si asa, “Turu, palekia mua teqe mamu ene.”

⁹Meke pa totoso tugo asa si ta salaṉa sa tie, meke palekia sa sa nana teqe meke topue ene. Pa rane Sabati si evaṉia Zisu sapu guahe,

¹⁰ke zama ia rina koimata tadi na tie Ziu sa tie pu ta salaṉa, “Na rane Sabati si hie meke ta hukata pa nada tinarae si pude paleke teqe si goi.”

¹¹Ba olaṉa la i sa si arini, “Sa tie tu sapu salaṉau, si garunau pude palekia sa qua teqe.”

¹²Ke nanasia rini si asa, “Esei sa tie, sapu tozi nigo pude tavete gua asa?”

¹³Ba lopu gilania sa tie sapu e Zisu si asa, sina moatana sa tie vasina, meke ele va muluhipuru taloa nana tu se Zisu.

¹⁴Ba mumudi si dogoria Zisu si asa pa korapa Zelepade, meke zama la ia Sa si asa, “Dotu, ele ta salaṉa si goi, ke mu lopu tavete va sea pule sina be gua asa si kote kaleamu hola si goi,” gua si Asa.

¹⁵Ke la tozi ni sa sari na koimata tadi na tie Ziu sapu e Zisu si salaṉia si asa.

¹⁶Ke podalae ṉoṉovalia rini se Zisu, sina salaṉia Sa sa tie pa rane Sabati.

¹⁷Meke olaṉa la i Zisu sarini, “Sa Tamaqu si tavetavete lamo kamo pa rane ṉinoroi, ke Arau ba korapa tavetavete tugo.”

¹⁸Gua asa ke bugoro sisigiti nia ri na koimata tadi na tie Ziu, meke hiva va matea rini si Asa. Sina lopu tale koasa sinekena mo sa tinarae Sabati, ba na zama nia tugo Sa sapu sa Tamasa si na Tamana soti, gua asa ke va kekeṉoṉo pule nia mo koe Tamasa si Asa, gua.

¹⁹Meke olaṉa la i Zisu si arini, “Maqu tozi va hinokarani gamu: sa Tuna si lopu boka tavetia sa Nana hiniva soti telena, ba tale gua mo sapu dogori Sa koasa Tamana. Ke gua mo sapu taveti sa Tamana, si taveti tugo sa Tuna.

²⁰Ura tataru sisigiti nia sa Tamana sa Tuna, ke va dogoro ni Sa koa Sa sari doduru gua pu korapa taveti Sa telena. Meke kote va dogoro ni pule sa Tamana koa sa Tuna sari na tiṉitoṉa arilaedi, pude taveti, hola ni saripu gua hire, meke kote magasa hola si gamu doduru.

²¹Kekeṉoṉo gua tugo sapu va toa pulei sa Tamana saripu matedi, si kaqu poni tinoa sa Tuna si arini pu hiva ni Sa pude poni.

²²Gua tugo koasa tinavete varipitui, si lopu pitui sa Tamana telena sari na tie, ba poni nia Sa koasa Tuna sa ṉiniraṉira pude pitui sari na tie,

²³pude doduru tie si kaqu va lavatia sa Tuna, kekeṉoṉo gua tugo sapu va lavatia rini sa Tamana. Ba asa sapu lopu va lavatia sa Tuna si lopu va lavatia tugo sa sa Tamana sapu garununa sa Tuna.

²⁴Ego, maqu tozi va hinokarani gamu, asa sapu avosi sari Qua zinama meke va hinokaria si Asa sapu garunuqu Rau, si ele vagia sa sa tinoa hola. Lopu kaqu tava kilasa pa Heli d sa tie sana, sina ele hola nia sa sa minate, meke ele karovo la pa tinoa.

²⁵Maqu tozi va hinokarani gamu, korapa mae sa totoso meke ele kamo mo si asa, sapu pana va avosia meke va tabea rini pu mate sa mamalaiṉina sa Tuna Tamasa, si kaqu toa si arini.

²⁶Gua tugo sapu telena sa Tamana sina ṉatina sa tinoa, si poni nia Sa koasa Tuna pude na ṉatina sa tinoa.

²⁷Meke ponia tugo Tamasa koa Sa sa ṉiniraṉira pude varipitui, sina na Tuna na Tie si Asa.