Zone 5:16-43

¹⁶Ke podalae ṉoṉovalia rini se Zisu, sina salaṉia Sa sa tie pa rane Sabati.

¹⁷Meke olaṉa la i Zisu sarini, “Sa Tamaqu si tavetavete lamo kamo pa rane ṉinoroi, ke Arau ba korapa tavetavete tugo.”

¹⁸Gua asa ke bugoro sisigiti nia ri na koimata tadi na tie Ziu, meke hiva va matea rini si Asa. Sina lopu tale koasa sinekena mo sa tinarae Sabati, ba na zama nia tugo Sa sapu sa Tamasa si na Tamana soti, gua asa ke va kekeṉoṉo pule nia mo koe Tamasa si Asa, gua.

¹⁹Meke olaṉa la i Zisu si arini, “Maqu tozi va hinokarani gamu: sa Tuna si lopu boka tavetia sa Nana hiniva soti telena, ba tale gua mo sapu dogori Sa koasa Tamana. Ke gua mo sapu taveti sa Tamana, si taveti tugo sa Tuna.

²⁰Ura tataru sisigiti nia sa Tamana sa Tuna, ke va dogoro ni Sa koa Sa sari doduru gua pu korapa taveti Sa telena. Meke kote va dogoro ni pule sa Tamana koa sa Tuna sari na tiṉitoṉa arilaedi, pude taveti, hola ni saripu gua hire, meke kote magasa hola si gamu doduru.

²¹Kekeṉoṉo gua tugo sapu va toa pulei sa Tamana saripu matedi, si kaqu poni tinoa sa Tuna si arini pu hiva ni Sa pude poni.

²²Gua tugo koasa tinavete varipitui, si lopu pitui sa Tamana telena sari na tie, ba poni nia Sa koasa Tuna sa ṉiniraṉira pude pitui sari na tie,

²³pude doduru tie si kaqu va lavatia sa Tuna, kekeṉoṉo gua tugo sapu va lavatia rini sa Tamana. Ba asa sapu lopu va lavatia sa Tuna si lopu va lavatia tugo sa sa Tamana sapu garununa sa Tuna.

²⁴Ego, maqu tozi va hinokarani gamu, asa sapu avosi sari Qua zinama meke va hinokaria si Asa sapu garunuqu Rau, si ele vagia sa sa tinoa hola. Lopu kaqu tava kilasa pa Heli d sa tie sana, sina ele hola nia sa sa minate, meke ele karovo la pa tinoa.

²⁵Maqu tozi va hinokarani gamu, korapa mae sa totoso meke ele kamo mo si asa, sapu pana va avosia meke va tabea rini pu mate sa mamalaiṉina sa Tuna Tamasa, si kaqu toa si arini.

²⁶Gua tugo sapu telena sa Tamana sina ṉatina sa tinoa, si poni nia Sa koasa Tuna pude na ṉatina sa tinoa.

²⁷Meke ponia tugo Tamasa koa Sa sa ṉiniraṉira pude varipitui, sina na Tuna na Tie si Asa.

²⁸Mi lopu magasa nia sapu gua ele tozini gamu Rau. Ura korapa mae sa totoso pana kaqu avosia ri doduru tie matedi pa korapa lovu sa mamalaiṉina sa Tuna na Tie,

²⁹meke kaqu toa pule meke vura mae pa dia lovu sari doduru, meke arini pu tavete valeana, si kaqu turu pule pa tinoa hola, ba sarini pu tavete va kaleana si kaqu turu pule pude tava kilasa pa Heli.

³⁰Loketoṉa si boka tavetia Rau pa Qua ṉiniraṉira soti telequ, ba gua mo sapu tozi Nau sa Tamasa. Ke toṉoto nana sa Qua vinaripitui, sina lopu lulia Rau sa Qua hiniva ba sa hiniva mo tanisa Tamaqu sapu garunuqu Rau.

³¹Be va sosode pule Nau telequ si Rau, si kote kilui gamu sari na Qua zinama.

³²Ba koa nana si asa sapu va sosode Au, meke gilania Rau sapu hinokara sa nana zinama.

³³Ele garunu lani tu gamu koe Zone sari kaiqa mia tie, meke ele va sosodea tu sa sa hinokara.

³⁴Sa qua vina sosode tana tie si lopu ta hivae koa Rau, ba pude mi ta harupu gua, ke zama ni Rau saripu gua hire.

³⁵E Zone si guana keke zuke toana meke sa kalalasana si ele qetu paki nia gamu.

³⁶Ba sa vina sosodequ Rau si arilaena hola nia sapu te Zone. Sari Qua tinavete saripu poni Nau sa Tamaqu pude taveti, si va sosodea sapu ta garunuqu si Rau koasa Tamaqu.

³⁷Meke sa Tamaqu pu garunuqu Rau, si va sosode Au tugo si Arau. Ba namu lopu hite avosia gamu sa mamalaiṉina babe dogoria gamu si Asa.

³⁸Meke lopu koa pa korapa bulomia sari Nana zinama, sina lopu va hinokaria gamu si Asa pu ta garununa koa sa Tamasa.

³⁹Tiro hatai gamu sari na Kinubekubere Hope, sina vasina si kote vagia gamu sa tinoa hola, balabala gua si gamu! Ba sari na Kinubekubere Hope arini si tozia mo sa guguaqu Rau.

⁴⁰Gua ba koromia mae koa Rau si gamu, pude vagia sa tinoa hola.

⁴¹Ba lopu okoro nia Rau si pude va lavatau rina tie.

⁴²Ba gilana gamu Qua, sapu loke mia tataru si gamu koe Tamasa pa korapa bulomia.

⁴³Pa korapa hiniva tanisa Tamaqu si mae si Rau, ba koromia avosau gamu. Ba be guana mae si keke tie pa nana hiniva soti telena si kote va hinokaria mo gamu.