Zone 2:4-24

⁴“Tinaqu, na vea ke tozi Nau tu goi, ura lopu ele kamo sa Qua totoso,” olaṉa gua se Zisu.

⁵Meke zama la koari na nabulu sa tinana Zisu, “Mi tavetia sapu gua kaqu tozini gamu Sa,” gua.

⁶Turu kapae dia si ka onomo vovoina kolo, sapu tana huve va via tie luli gua pa dia tinarae, sapu hopeke pada zuapa ṉavulu lima babe keke gogoto manege lima lita kolo boka voi i.

⁷Meke zama la koari na nabulu se Zisu, “Toṉo va siṉi ni kolo sari na vovoina kolo hire.” Ke va siṉi luluapae ni kolo rini.

⁸Meke tozi ni Sa, “Ego, mi toṉo va karovo vagi kaiqa kolo, mamu paleke lani koasa tie kopuna sa inevaṉa,” gua si Asa, ke tavetia tugo rini sapu gua tozi ni Sa.

⁹Meke sipu napoa sa tie kopu inevaṉa, si va liṉiliṉia sa sa kolo sapu ele ta ilirae vaeni hinokara, ke magasa sisigiti si asa. Ba lopu gilania sa sapu pavei mae guana sa vaeni hie, ba sari na nabulu mo pu toṉona sa si gilania. Gua asa, ke tiokia sa sa tie varihaba, meke zama,

¹⁰“Tio, sa vaeni leana hola gua hie si hoke tava hia kekenu koari na tie, meke sipu ele beto napo va soku rini, si tiqe hoke va hia ia rini sa kolo vaeni sapu pasana. Ba agoi si kopu veko nia sa vaeni leanana, meke kamahire tu tiqe va vura ia goi si asa,” gua si asa.

¹¹Hie tugo sa tinavete variva magasa kekenu hokara sapu tavetia Zisu pa vasileana Kena pa popoa Qaleli; sapu va dogoro nia Sa vasina sa Nana ṉiniraṉira, ke va hinokaria ri Nana disaepeli si Asa.

¹²Sipu beto saripu gua hire, si ene gore la pa Kepaniami se Zisu meke sa tinana, sari na tasina koreo meke sari Nana disaepeli, meke la koa hite kaiqa rane vasina si arini.

¹³Ego, tata sa totoso tanisa Inevaṉa Pasova d, ke topue sage la pa Zerusalema se Zisu.

¹⁴Sipu kamo Sa vasina si nuquru la si Asa koasa varivarigarana tanisa Zelepade, meke dogori Sa vasina sari na tie pu korapa vari holuholui bulumakao na sipi na baruku, meke sari na tie pu korapa hobehobe poata Roma la pa poata tadi tie Ziu, habotu dia koari na tevolo.

¹⁵Ke tavetia Sa si keke hilihiliburuana meke hadu vuravura ni Sa sari doduru kurukuru: sari na sipi na bulumakao pa Zelepade. Meke tupele titisi ni Sa sari na tevolo tadirini pu vari hobehobei poata, ke talahuarae limilamae sari na dia poata.

¹⁶Meke zamai Sa sari na tie pu holuholu baruku, “Paleke va seui sari na tiṉitoṉa hire! Mu lopu tavete gunia na vasina holuholuana sa vetu tanisa Tamaqu,” gua si Asa.

¹⁷Meke balabala ia ri Nana disaepeli d sapu gua zama nia sa Kinubekubere Hope, sapu guahe: “Qua Tamasa, tataru sisigiti nia Rau sa Mua Zelepade d, ke ta sigiti nia Rau gua na nika pa buloqu,” gua.

¹⁸Ke mae nanasia ri na koimata tadi na tie Ziu se Zisu, “Na vina gilagila sa si boka tavetia goi pude va sosodea gami sapu na ari Mua ṉiniraṉira si Goi pude tavetia si hie?” gua si arini.

¹⁹Meke olaṉa se Zisu, “Huaria sa Zelepade hie, meke pa rane vina ṉeta si kaqu va turu pulea Rau si asa,” gua si Asa.

²⁰“Vegua, kaqu va turu pulea mo goi pa ka ṉeta rane sia? Sina ka made ṉavulu onomo vuaheni tu seunaena gua sa kinurina sa Zelepade hie!” gua si arini.

²¹Ba sa Zelepade sapu gunia Zisu si sa tinina mo.

²²Ke mudina sapu turu pule pa minate si Asa, si balabala pulea ri Nana disaepeli gua sapu zama nia Sa, ke va hinokaria rini sa Kinubekubere Hope meke sa zinama te Zisu.

²³Sipu koa pa Zerusalema pa totoso Inevaṉa Pasova d se Zisu, si va hinokaria ri soku tie si Asa, sina dogori rini sari na tinavete variva magasadi pu taveti Sa.

²⁴Ba lopu kalavarae la i Zisu si arini, sina ele gilana betoi Nana tu Sa sari doduru tie.