Zone 21:11-24

¹¹Meke suraṉa pule la pa koaka se Pita, meke balu gore la nia pa masa sa vaqara, sapu siṉia na igana nomadi, padana keke gogoto lima ṉavulu ṉeta ninaedi sari doduru. Soku hola ba lopu hite boka rikata sa vaqara.

¹²Meke zama la koa rini se Zisu, “Mae gamu mamu henahena paki,” gua si Asa. Ba loke tie ri kasa si ona hiva nanasia si Asa, “Esei si Goi?” sapu gua, sina na doṉo gilania dia rini sapu Asa tugo sa Baṉara.

¹³Meke mae se Zisu, meke vagi Sa sari na bereti meke vala ni Sa koa rini meke tavete kekeṉoṉo guni ni tugo Sa sari na igana.

¹⁴Hiera tugo sa totoso vina ṉeta sapu la vata dogoro se Zisu koari na disaepeli pa mudina sa Nana tinuru pule pa minate.

¹⁵Meke sipu beto henahena rini, si zama la koe Saimone Pita se Zisu, “Saimone, tuna e Zone, vegua, tataru zoṉazoṉa Nau tugo goi, hola nia sa tataru tadirini sara,” Meke olaṉa se Saimone, “Uve, Baṉara, gilania Mua sapu tataru nigo rau,” gua si asa. Meke zama se Zisu, “Mu poni sari na Qua lami,” gua si Asa.

¹⁶Meke nanasa pule la tugo koa sa se Zisu pa vina rua totoso, “Saimone, tuna e Zone; tataru Nau tugo goi si Rau?” Meke olaṉa se Saimone, “Uve, Baṉara, gilania Mua Goi sapu tataru nigo rau.” “Ego, mu kopu ni sari na Qua sipi,” gua se Zisu.

¹⁷Ba zama pule la tugo koasa pa vina ṉeta totoso si Asa, “Saimone, tuna e Zone, tataru Nau goi si Rau?” Meke talotaṉa hola nia Pita sapu gua asa, sina nanasa gunia he Zisu ka ṉeta totoso, “Tataru Nau goi,” gua. Ke zama la koa Sa si asa, “Baṉara, doduru tiṉitoṉa si gilani Goi. Ke ele gilanau Mua mo sapu tataru nigo rau si Goi!” Meke olaṉa la ia Zisu si asa, “Ego mu poni sari na Qua sipi.

¹⁸Maqu tozi va hinokara nigo, pa totoso tie vaqaramu si hoke vatana pulenigo telemu meke hoke la vasina pu hiva la ia goi, ba pana barogoso goi si kote va nadori goi sari na limamu, meke votiki tie tu kote va pokogo, meke kote turaṉa la nigo vasina sapu lopu emu hiva la ia goi,” gua se Zisu.

¹⁹Zama nia Zisu si hie pude tozia sa guguana sa minate sapu kote va kamoa Pita pude va lavatia sa Tamasa, gua. Meke beto asa si zama la koa sa se Zisu, “Mae mamu luli Au,” gua si Asa.

²⁰Liṉana se Pita meke dogoria sa sa disaepeli sapu tataru nia Zisu, asa sapu rizu tata koe Zisu pa totoso henahena rini, meke sapu nanasa, “Esei tugo si kote qoramu Goi?” gua.

²¹Sipu dogoria tugo Pita si asa, si nanasa la ia sa se Zisu, “Baṉara, vegua sa tie hie?” gua si asa.

²²Meke olaṉa se Zisu, “Be hiva nia Rau pude toa kamoa sa sa Qua pinule mae, si lopu mua ginugua goi pude gilania. Agoi si mamu luli Au mo!” gua si Asa.

²³Ke ene sa inavoso koari na tie saripu lulia se Zisu sapu lopu kaqu mate sa disaepeli hie, gua. Ba lopu gua asa sapu zama nia Zisu, ba gua mo he: “Be hiva nia Rau pude toa kamoa sa sa Qua pinule mae si pude vegua ke nominomi nia goi si asa,” gua mo.

²⁴Asa tugo sa disaepeli sapu helahelae ni saripu gua hire, meke asa tugo sapu kubere gore ni si arini, meke gilania gita sapu gua zama ni sa si hinokara tugo.