Zone 19:24-38

²⁴Meke vari zamai sari solodia, “Mada lopu rikatia ba mada variva mudumudukeda nia, mada dogoria sapu esei kote vagia sia,” gua si arini. Ta evaṉa si hie pude ni tava gorevura sapu gua ta kubere koasa Kinubekubere Hope sapu guahe: “Vari hia ni rini sari na Qua poko meke vari mudumudukeda nia rini sa Qua poko doduru.” Ke gua asa sapu tavetia rina solodia.

²⁵Ba turu tata dia pa korosi vasina pu ta pokae se Zisu, se Mere sa tinana, sa vavenena sa tinana, meke e Mere sa loana e Kilopasi, meke e Mere sapu mae guana pa Magidala.

²⁶Meke sipu dogoria Zisu sa tinana meke sa disaepeli sapu tataru hola nia Sa, korapa turu dia vasina, si zama la koasa tinana si Asa, “Isa sa tumu,” gua si Asa.

²⁷Meke zama la tugo koasa disaepeli si Asa, “Isa sa tinamu,” gua. Podalae koasa totoso tugo asa, si turaṉa vagia sa disaepeli sa tinana Zisu meke la koa pa nana vetu.

²⁸Sipu gilania Zisu sapu ele hokoto kamahire sari doduru tiṉitoṉa meke pude tava gorevura valeana, sapu gua ele ta kubere pa Kinubekubere Hope, gua, si zama si asa, “Memeha Qua,” gua.

²⁹Koanana si keke vovoina, sapu siṉia na vaeni d pasana, ke sipu avosia rini sa zinama te Zisu si poṉa la nia rini koasa vaeni si keke puha, meke va sotoa rini pa batuna keke huda meke va sage la nia rini pa beruna Zisu.

³⁰Meke sipu beto napoa Zisu sa vaeni si zama si Asa, “Ele beto hokara.” Meke tiqe va todoṉo gorea Sa sa batuna meke luaria Sa sa maqomaqona.

³¹Ura na rane va namanama bisa sa rane asa, meke koivugona si kote na rane Sabati arilaena pa korapana sa vuiki Pasova. Sina lopu hiva ni ri na tie Ziu pude sigoto hola pa korosi sari na tini pa rane hopena asa, ke la tepa koe Paelati sari kasa pude mokui nenedi sari tie pa korosi, pude tuturei mate meke va gorei sari tinidia.

³²Gua asa ke la mokui rina solodia sari na nenedi ri karua tie, sapu ta pokae turaṉae koe Zisu pa korosi.

³³Ba sipu la dia koe Zisu gua si dogoria rini sapu ele mate tu si Asa, ke lopu mokui rini sari nenena.

³⁴Ba huma nia hopere keke solodia si Asa pa kali qeleqelena, meke zoloro vura va hodaka sa ehara na kolo pa tinina Sa.

³⁵Meke sa tie pu dogorona sapu gua ta evaṉa si helahelae vura ni sa saripu gua hire, pude gamu ba kote va hinokara. Ura saripu zama ni sa si hinokara tugo, meke gilania sa telena sapu zama hinokara si asa.

³⁶Ta evaṉa saripu gua hire pude tava gorevura sa Kinubekubere Hope sapu zama guahe: “Lopu keke rina susurina si kote ta moku,” gua.

³⁷Meke keke zinama pule pa Kinubekubere Hope si zama guahe: “Kaqu doṉo la ia ri sa tie pu huma ia rini,” gua.

³⁸Sipu hola sapu gua asa, si mae koe Paelati si keke tie pozana e Zosepa, na tie pa Arimatia si asa, meke tepa ia sa sa tinina e Zisu koe Paelati, ke va malumu la nia Paelati si asa. Zosepa si keke disaepeli golomona te Zisu ba koa gua sapu matagutu ni sa sari na koimata tadi na tie Ziu ke lopu vata gilana si asa koari na tie.