Zone 19:1-19

¹Meke tozi ni sa sari na solodia pude seke nia hilihiliburuana se Zisu.

²Meke tavetia rina solodia si keke piribatu rakirakihi guana toropae baṉara, meke va hakea rini pa batuna, meke va sage nia poko pepolo tana baṉara rini si Asa.

³Beto asa si mae zama guahe koa Sa si arini, “Mani toa va gelenae sa Baṉara tadi na tie Ziu,” gua. Meke la pihipoharia rini sa isumatana Sa.

⁴Meke vura pule la koasa kobi tinoni se Paelati meke zama, “Ego, turaṉa vura pule atu nia rau koa gamu si Asa pude vata gilana nia koa gamu, sapu lopu boka vagia rau si keke ginugua pude zutu nia koa Sa,” gua si asa.

⁵Ke totoso vura mae se Zisu, si toropae nia Sa sa toropae rakihi, meke poko nia Sa sa poko baṉara meke zama se Paelati. “Dotu, sa tie!” gua.

⁶Sipu dogoria tugo ri kasa ṉati hiama na tie kopu Zelepade se Zisu, si velavela si arini, “Va matea gana pa korosi! Va matea gana pa korosi!” gua si arini. Meke zama la koa rini se Paelati, “Mae vagia gamu, mamu va matea pa korosi. Ba sapu arau si namu loke ginugua hokara si dogoria rau koa Sa pude vata zutu nia,” gua se Paelati.

⁷Ba olaṉa pule la tugo koa sa sa vinarigara lavata, “Koa nana sa mami Tinarae, meke koasa Tinarae asa si kaqu tava mate tugo sa tie sapu guahe. Ura zama si Asa, ‘Arau si na Tuna Tamasa,’ guni pule nia,” gua si arini.

⁸Sipu avosia tugo Paelati sapu gua asa, si matagutu sisigiti si asa.

⁹Ke nuquru pule la pa nana vetu qavuna se Paelati meke nanasia sa se Zisu, “Pavei mae guamu si Goi?” Ba korona olaṉia Zisu si asa.

¹⁰Ke zama se Paelati, “Na vegua ke koromu olaṉa mae au tu Goi? Lopu gilanau tu Goi, sapu arau tagoa sa ṉiniraṉira pude vata rupahigo babe va matego pa korosi?” gua si asa.

¹¹Meke olaṉa la se Zisu, “Loke mua ṉiniraṉira telemu si goi, be lopu poni nigo sa Tamasa. Ba sa sinea tanisa tie pu luara lani Au koa goi si kaleana hola nia sa mua sinea.”

¹²Sipu avosia Paelati sapu gua asa, si podekia sa pude vata rupahia se Zisu, ba velavela pule la sa vinarigara lavata, “Be vata rupahia goi si Asa, si lopu na baere tanisa baṉara Roma si goi! Sina asa sapu zama, ‘Arau si na baṉara,’ gua si na kana te Siza si asa!” gua si arini.

¹³Totoso avosi Paelati sari na zinama arini, si turaṉa la nia sa pa sada se Zisu meke habotu si asa pa habohabotuana varipitui, sapu ta tavetae patu laṉolaṉono lavata. (Pozana si Qabata pa zinama Hiburu.)

¹⁴Ele tata korapa rane sa popoa koasa rane va namanama, meke pana veluveluna sa rane sana si kote kamo sa rane Sabati tanisa vuiki Pasova, gua, ke zama la koari na tie se Paelati, “Dotu, sa mia Baṉara!” gua si asa.

¹⁵Ba velavela pule la si arini, “Va matea! Va matea gana pa korosi!” gua si arini. Meke nanasa la i Paelati si arini, “Hiva nia gamu pude va matea rau pa korosi sa mia baṉara?” Meke olaṉa sari na ṉati hiama, “Loke mami baṉara pule si gami ba e Siza mo!” gua si arini.

¹⁶Ke tiqe va malumu vala nia Paelati koa rini se Zisu pude madi va matea pa korosi, gua. Meke turaṉa taloa nia rina solodia se Zisu.

¹⁷Meke palekia Sa sa nana korosi, meke la kamo pa keke vasina sapu ta pozae, “Batu Tomate,” (Pa zinama Hiburu si Qoloqota.)

¹⁸Vasina si poka nia rini si Asa pa korosi. Meke karua tie pule si pokani tugo rini pa hopeke dia korosi, koa varikali pa karu kalina e Zisu.

¹⁹Meke kuberia Paelati si keke kinubekubere sapu guahe: “ZISU PA NAZARETI, SA BAṈARA TADINA TIE ZIU,” gua. Meke va sotoa sa pa batuna sa korosi.