Zon 8:25-34

²⁵Dem pipol i bin spik po Zizas, ‘Spik mipla uda yu?’ Zizas i bin ansa, ‘Ai bin pinis spik yupla uda mi de pas.

²⁶Ai gad plentiting wea ai wande spik po yupla ane plenti rizan po zaze yupla. Bat ai nogo mekem bikoz ai mata spik dem tok wea ai bin lisen prom da wan uda i bin sane mi kam, ane em i mata blo trutok.’

²⁷Dempla no bin sabe da mining dat Zizas i bin tokbaut PapaGod blo em po dempla.

²⁸Zizas i bin spik po dempla, ‘Wen yupla i go liptemap da Truwan blo Man, den yupla go prapa sabe uda mi, da BosLod. Ai no meke eniting wanem ai wandem, bat ai mata spik wanem PapaGod i bin lane mi.

²⁹Em uda i bin sane mi kam, mata em ebritaim stap klostu wea mi. Em prapa no bin libe mi bikoz ai ebritaim meke dem samting wea i meke em prapa api.’

³⁰Dem tok ya wea Zizas i bin spik, prapa tumas pipol i bin mata bilib wea em.

³¹Zizas i bin spik po dem pipol uda i bin bilib wea em diskain, ‘Ip yupla i mata kip pole dem mesiz wea ai prisem, wa, yupla i ol klostuman blo mi.

³²Ane yupla i go prapa sabe da trutok baut God ane da trutok baut God i go meke yupla pri.’

³³Bat dempla i bin ansa baigen po Zizas diskain ya, ‘Mipla i ol Zuwispipol. Mipla i ol pamlelain blo Eibram ane mipla no sleib blo enibodi. Bat wanem mining blo tok blo yu, “meke yupla pri”?’

³⁴Zizas i bin ansa, ‘Ai spik trutok po yupla, enibodi uda i mata stap andanit da paua blo meke nugudting gense God, wa, dempla i sleib blo sin.