Zon 6:20-40

²⁰Bat Zizas bin singaut po dempla, ‘Sa, mi ya Zizas! Yupla no akan!’

²¹Wen dem klostuman bin megaraut Zizas, wantaim dempla i bin prapa api po em po kam wea da bot. Stretwei nau da bot i bin kese da sanbis blo dat ples wea ol i bin go po.

²²Da neksdei nau, dem bigmob pipol uda i bin stap de weit lo nadasaid blo Leik Galali po Zizas, dempla i bin luk i bin mata gad wan bot de daun. Dempla i bin sabe Zizas i no bin go wea da bot wea dem klostuman blo em.

²³Ol nada bot prom dat biliz blo Taibirias i bin kam klostu po da ples wea da BosLod i bin eso God po dem balibred wea dem bigmob pipol i bin kaikai.

²⁴Wen dem bigmob pipol i bin paindaut nau Zizas ane dem klostuman blo em i no bin de, dempla i bin zamp insaid dem bot ane prapa lukraun Zizas go po Kapaniam.

²⁵Wen dem pipol i bin paine Zizas de lo Kapaniam, ol bin spik po em, ‘Tisa. Wiskain yu bin kesem ya?’

²⁶Zizas bin ansa dempla, ‘Ai spik trutok po yupla, yupla i bin prapa lukraun mi bikoz yupla bin prapa belipul prom dem kaikai. Yupla i no bin lukraun mi bikoz ai bin meke dem mirikalsain.

²⁷Yupla i mas no wok po kaikai wea i go pinis, nomo gad, bat yupla mas wok lukraun dis kaikai, longlaip poeba, wea da Truwan blo Man i ken gibe yupla. Bikoz PapaGod i bin sane mi po dat prapa seimting nau.’

²⁸Dempla spik diskain po Zizas, ‘Wanem mipla mas mekem wea God i wandem?’

²⁹Zizas i bin spik baigen po dempla, ‘Diswan ya wanem God i wandem: yupla mata bilib wea da wan wea em bin sanem kam.’

³⁰Dem pipol i bin spik baik po Zizas, ‘Wanem mirikalsain nau yu go mekem prant wea mipla solong mipla i go mata bilib wea yu? Wanem yu go mekem?

³¹Ol bigate blo mipla i bin kaikai dat spesil bred, kolem mana, wen ol bin wagbaut wea dezet eria wea i nogad no man. I bin raitem wea Baibol, “Mozes i bin gibe dempla bred po kaikai wea i bin kamdaun prom eben.” ’

³²Zizas i bin spik po dempla, ‘Ai spik trutok po yupla, Mozes no bin gibe dempla da bred wea i kamdaun prom eben. PapaGod blo mi i bin gibem, ane em nau i gibe yupla da prapa bred wea i kamdaun prom eben.

³³Wa, da bred wea God i gibem i da wan uda i kamdaun prom eben ane i gibe laip po ebri pipol blo dis wold.’

³⁴Dempla i bin aske Zizas, ‘BosLod, mata gibe mipla dis bred ebritaim.’

³⁵Zizas i bin ansa dempla, ‘Ai da bred blo mata gibe laip. Demwan uda i kam po mi, dempla nomo go anggre gen. Demwan uda i mata bilib wea mi, dempla nomo go tasti gen.

³⁶Yupla i bin luk mi lo ai, bat stil yupla no bin bilib mi.

³⁷Ebriting wea PapaGod i bin gibem po mi, i gobi mata blo mi, ane ebri demwan uda i kam po mi, ai prapa nogo seswei dempla.

³⁸Ai bin kamdaun prom eben. Ai no bin kamdaun po mekem wanem ai wandem, bat ai bin kamdaun po mekem wanem God i wandem, bikoz em bin sane mi kam.

³⁹Diswan ya i prapa wanem PapaGod i wandem, dat ai nogo luze eniwan prom demwan wea em i bin gibem po mi. Bat ai mas meke dempla ebribodi kamlaip poeba wea dat lasdei wen God i go zaze ebri pipol.

⁴⁰Wa, diswan nau i wanem God i prapa wandem, ebribodi uda mata luk po da Boi blo God ane mata bilib wea em i go mata stap longlaip poeba. Ane ai go meke dempla gedap prom ded kam po longlaip poeba lo dat lasdei.’