Zinama Tumatumae 8:1-35

¹Va avoso! Sa ginilagilana lohina si korapa titioko! Korapa hiva ta avoso sa ginilae.

²Koari na siraṉa pa batu toqere, meke turu nana koari na vari pazadi.

³Tata pa sasada nuquru koari na vasileana nomadi; koari na siraṉa la pa vasileana si kukili vura si asa:

⁴“Koa gamu doduru tie si titioko vura si rau; zama va ululae si arau koa gamu doduru tinoni,

⁵Gamu pu pupuhu, mi vagia sa ginilae; gamu na pekipeki si mi vagia sa ginilagilana.

⁶Avoso mae, ura na ginugua arilaedi si kote zama ni rau; na toṉotodi si kote zama ni sa beruqu.

⁷Sa ṉuzuqu si zama va hinokara, meke na kokoha si kaleana pude tozia pa beruqu.

⁸Doduru zinama pa ṉuzuqu si toṉoto, lopu keke si kaleana babe turaṉa va sea tie.

⁹Koa rini pu vizavizata va toṉoto si toṉotodi mo sari qua zinama, meke kalalasa koarini pu gilagilana.

¹⁰Sa qua tinarae si mamu vizata vagia lopu sa siliva; na tinumatumae lopu sa qolo arilaena.

¹¹Ura sa ginilagilana lohina si arilaena hola nia sa patu ṉedala, meke loketoṉa sapu okoro nia goi si boka va padapada la nia goi koa sa.

¹²Arau, sa ginilagilana lohina si koa turaṉia sa ginilae pude vizata valeana; arau tagoa sa tinumatumae meke sa vinilasa toṉotona.

¹³Pude pamaṉa nia se Zihova si na hinakohakona sa kinaleana; arau kana ia sa vinahesi pule meke sa vina titie, gua tugo sa hahanana kaleana meke sa kokoha.

¹⁴Sa variponi binalabala meke sa vinizata toṉoto si taqarau; arau tagoa sa ginilagilana meke sa ṉiniraṉira.

¹⁵Koa rau si tuturaṉa sari na baṉara meke sari koimata si tavete tinarae sapu ṉoṉo;

¹⁶koa rau si totoli sari palabatu, meke sari doduru koimata pu kopu nia sa kasia popoa.

¹⁷Tataru ni rau sarini pu tataru nau, meke arini pu hata au si dogoro au tugo.

¹⁸Koa rau koa sari tinagotago meke vina lavata, sa tinago sapu koa hola meke sa kinoa valeana.

¹⁹Sa vuaqu rau si leana hola nia sa qolo viana, sapu podaka vura koa rau si hola nia sa siliva arilaena.

²⁰Arau si lulia sa hahanana sapu ṉoṉo, meke ene pa siraṉa sapu toṉoto,

²¹va tago i sarini pu tataru nau, meke va siṉi ni likakalae arilaedi rau sari dia vetu.

²²Se Zihova va podaka kekenu au si rau koari Nana tinavete, sipu lopu ele sari doduru pule.

²³Arau si ta vizata pukerane latu, pa pinodalaena sipu lopu ele podaka sa kasia popoa.

²⁴Sipu lopu ele koa sari na kolo lamana, meke lopu ele koa sari bukaha sapu gavoro va soku kolo si podo si rau.

²⁵Sipu lopu ele tava garo la pa dia vasidi sari na toa, meke lopu ele koa sari na toqere, si podo si rau.

²⁶Sipu lopu ele tavetia Sa sa kasia popoa meke sa pepesona, babe sa kavuruna sa kasia popoa si podo si rau.

²⁷Arau si koa qua totoso va garo la nia Sa sa maṉauru pa nana vasina, totoso gasi vura nia Sa sa hubi lamana,

²⁸totoso vekoa Sa sa galegalearane meke sari na lei panaulu meke tukeli sari bukaha pa lamana peava,

²⁹totoso vekoa Sa vasina kote kokoi sa kolo hokara, meke volosi Sa sari na kolo pude kopu ni dia boku, meke totoso podalae kuria Sa sa kasia popoa.

³⁰Arau mo sa Nana tie tavetavete pu koa pa kalina Sa. Siṉi au na qinetuqetu ninae rane, qetuqetu lamo si rau pa kenuna Sa.

³¹Qetuqetu nia rau sa kasia popoa Tanisa meke qetu ni rau sari tiena sa kasia popoa.

³²Ego gamu na tuqu, mi avoso mae koa rau; ta manae si arini pu kopu ni sari qua tinarae.

³³Va avoso mae koasa qua vina tumatumae pude mu gilae; mi lopu kilu ia.

³⁴Ta manae sa tie pu va avoso mae koa rau, pu kopu totoko nia sa qua sasada, pu koa aqa pa qua sasada vetu.

³⁵Ura asa pu dogoro vagi au si vagia tugo sa sa tinoa, meke kaqu qetu nia tugo e Zihova si asa.