Zinama Tumatumae 3:7-27

⁷Mu balabala ia telemu sapu tie gilagilana si agoi; ba mu va tabea se Zihova mamu kilu pania sa kinaleana.

⁸Be gua asa si kote ta salaṉa sa tinimu, meke ṉiṉira sari susurimu.

⁹Va lavatia se Zihova koari mua tinagotago, meke koari na vua kenudi ri na mua linetelete;

¹⁰kaqu siṉi ta luluapae sari mua vetu kopu ginani, meke sari mua vovoina vaeni si kote siṉi hola.

¹¹Tuqu, mu lopu hakohako totoso va toṉotigo e Zihova meke lopu kilua sa Nana ginegese,

¹²sina e Zihova si va toṉoti mo sarini pu tataru ni Sa, gua sa tamana sapu gegesia sa tuna sina qetu nia sa.

¹³Ta manae sa tie sapu vagia sa ginilagilana lohina, asa sapu ta poni ginilagilana.

¹⁴Ura sa vinagi asa si hola nia sa siliva meke vua katakata, hola nia sa qolo.

¹⁵Sa ginilagilana lohina si arilaena hola ni sari na patu ṉedala; loketoṉa pu okoro nia goi si boka ta padapada la koa sa.

¹⁶Na tinoa va gelenaena si koa pa kali mataona, meke pa kali gedena si na tinagotago meke vina lavata.

¹⁷Sari siraṉa tanisa si na siraṉa variva qetu, meke bule sari doduru nana inene.

¹⁸Guana huda tinoa si asa koa rini pu hapahapa nia; arini pu harupu vagia si kote ta manae.

¹⁹Kuria e Zihova sa pepeso koasa Nana tinumatumae; koasa nana ginilagilana si vekoa Sa sa maṉauru pa nana vasina.

²⁰Pa Nana ginilagilana si va hoqa kolo sari na lei, meke varipaqaha ni Sa sari na kolo pa lamana na ovuku.

²¹Tuqu, mu va naqitia sa ginilae meke sa binokaboka pude mu balabala valeana, lopu va seu i pa matamu.

²²Kote toa ni agoi si arini, na vina sari pude va doṉo lea ia sa ruamu.

²³Gua si kote tiqe topue ene va bulei si agoi pa mua inene, meke lopu kaqu ta tubarae sa nenemu.

²⁴Pana eko goi si lopu kote matagutu; pa mua teqe si kote lomoso sa mua pinuta.

²⁵Mu lopu matagutu pana raza va hodaka sa tinasuna babe sa tinahuara pu kamo koari na tie kaleadi.

²⁶Ura kote raṉea agoi se Zihova, meke kote kopu nia Sa sa nenemu pude lopu neti pa sipata.

²⁷Tavete valeana la koa rini pu garo pude ta tokae, pana koa koa goi sa ṉiniraṉira pude tavete va leana.