Zinama Tumatumae 30:7-26

⁷Kei Zihova, karua ginugua mo si tepai rau koa Goi: lopu heki ni koa rau sipu lopu ele mate si rau:

⁸Va seu i koa rau sari zinama lopu hinokara meke kokohadi; lopu va malaṉa au ba lopu va tagotago au tugo, ba poni au sa gequ ginani doduru rane.

⁹Na be soku gequ si kote lopu raṉe Igo rau, meke kote zama, “Esei se Zihova?” Ba be pana malaṉa si rau meke hikohiko, si kote ṉoṉovala ia rau sa pozana e Zihova sa qua Tamasa.

¹⁰Mu lopu nanae na zutu ṉoṉovalia sa nabulu koasa nana palabatu; na kote leve nigo sa meke kote tinasuna si goi.

¹¹Koadia sarini pu leve ni sari tamadia meke lopu mana ni sari tinadia;

¹²sarini pu via, gua pa dia binalabala ba sari na kinaleadi si lopu ele tava via;

¹³sari matadia si doṉo va gore tie, meke liṉaliṉana va titie;

¹⁴sari livodia si guana vedara meke sari asedi si guana sotoi kobi magu pude ṉovali saripu malaṉa pa popoa pepeso, meke saripu loke gedi pa vari korapadi rina tinoni.

¹⁵Sa tie puhi si karua tuna vineki, “Poni au! Poni au!” gua sari karua. Koadia sari ka ṉeta tiṉitoṉa sapu lopu boka deṉa, ka made sapu lopu hoke zama, “Pada mo!”

¹⁶Sa lovu, sa barikaleqe sapu tige, sa pepeso qega, sapu lopu boka beto napo kolo, meke sa nika, sapu lopu hoke zama, “Pada mo!”

¹⁷Sa tie sapu va sisire nia sa tamana, sapu kilua sa vina tabe la koasa tinana, si kote gani i rina kurukuru pu hoke gani tie matedi, meke sari matadi si kote ta lobiti vagi koarini.

¹⁸Koadia sari ka ṉeta tiṉitoṉa sapu lopu boka beto magasa ni rau, ka made sapu lopu boka va bakali arau:

¹⁹sapu vea tedoro gua sa atata pa galegalearane, sapu vea gotolo gua sa noki koari na patu nomadi, sapu vea kalaha gua sa vaka koari na ololobagea, meke vea tataru gunia sa koreo sa vineki.

²⁰Gua hie sa hahanana tanisa barikaleqe barabaratana: Ganigani si asa meke ṉuzapia sa ṉuzuna meke zama, “Arau si loketoṉa sinea tavetia.”

²¹Ka ṉeta tiṉitoṉa hire si hoke niu nia sa popoa pepeso, ka made sapu lopu boka va tana i sa:

²²sa nabulu sapu evaṉae na baṉara, sa tie pekipeki sapu soku nia ginani,

²³sa barikaleqe variva hakohakona sapu varihaba, meke sa nabulu vineki sapu hobea sa barikaleqe ṉati hiniva.

²⁴Ka made tiṉitoṉa pa popoa pepeso sapu hiteke, ba tumatumaedi hola:

²⁵Sari menemene sapu hiteke hola dia ṉiniraṉira, ba hata vekoi rini sari gedi ginani pa totoso maṉini;

²⁶Sa horakisi sapu guana kurezu si lopu ṉiṉirana, ba tavete nana qoqoro koari na patupatu