Zinama Tumatumae 29:1-14

¹Asa pu ta gegese pilipule ba korona va avoso si kote kamo va hodakia na tinahuara sapu loke tinaleosaena.

²Totoso tuqe ṉiniraṉira sari tie toṉoto, si qetu sari tie; totoso kopu binaṉara sari tie kaleadi, si qumiqumi sari tie.

³Sa tie pu tataru nia sa ginilagilana lohina si qetu nia sa tamana; ba sa baere tadi na maqota si va murimuria sa nana poata.

⁴Pa tinavete toṉoto si va turu va nabu ia sa baṉara sa butubutu, ba sa puhi sapu vagi tinabara golomodi si huara gorena sa.

⁵Asa pu zama va lomolomosia sa turaṉana si ivara veko pule nia sipata telena.

⁶Sa tie kaleana si sipata pule nia koari nana sinea, ba sa tie toṉoto si boka kera meke qetuqetu.

⁷Sa tie toṉoto si hiva tavete va leana la koari pu malaṉa, ba sa tie kaleana si korona galagala.

⁸Sari tie va karikaridi si va gevuru vinevehe pa vasileana, ba sari tie gilae si va bulea sa ṉinoveoro.

⁹Be turaṉa la nia sa tie gilaena sa tie pekipeki pa vinaripitui, sa tie pekipeki si kote turu meke zama hoboro meke loketoṉa si boka toṉoto.

¹⁰Sari tie va matemate tiedi si kana hola i rini sari tie toṉoto, meke hata ginugua pude va matei sari tie ṉoṉo.

¹¹Sa tie pekipeki si zama vura ni sari nana tinaṉaziri, ba sa tie gilagilana si kopu pule nia meke lopu bugoro.

¹²Be sa baṉara si va avoso la koari na koha, si sari nana tie tavetave varitokae si na tie kaleadi mo.

¹³Guahe si vari kekeṉoṉo nia ri tie malaṉa meke ri tie ṉoṉovala, sapu e Zihova va dodogorae i matadi.

¹⁴Be pitui sa baṉara sari tie malaṉa pa tinoṉoto, sa nana binaṉara si kote habotu va nabu doduru totoso.