Zinama Tumatumae 27:9-15

⁹Na lumu meke na oela humaṉa lea si va qetuna sa bulo, meke sa lineana tanisa mua baere si guana ginani lomosona.

¹⁰Mu lopu luara pania sa mua baere meke sa baere tanisa tamamu, meke lopu la pa vetu tanisa tasimu pana raza igo tinasuna, sa turaṉamu pa kalimu si leana hola nia sa tasimu pa seu.

¹¹Tuqu, mu gilae, mamu va qetua sa buloqu; pude qu olaṉi sarini pu zama va gore au.

¹²Sa tie balabala valeana si dogoria sa tinasuna meke tome; ba sa tie pupuhu si totoro la meke ta raza nia sa.

¹³Vagia sa poko tanisa tie pu va egoa pude lipua sa gale tanisa votiki tie; tuqe vekoa osolae lipua sa sa gale tanisa tie karovona.

¹⁴Be pana munumunu hokara si mana nia sa tie si keke turaṉana, meke velavela nia sa, si kote ta avoso guana lineveleve mo.

¹⁵Na barikaleqe nominomi si guana honihoni pa vetu totoso rukuruku.