Zinama Tumatumae 26:2-14

²Guana omehe na kakia sapu tapuru holadi sa lineveleve hoborona si kote hola taloa nana.

³Guana sekesekeana hose meke kalakalahana doṉ'ki, sa kolu pa mudina sa tie pekipekina!

⁴Mu lopu olaṉia sa tie pekipekina koasa nana zinama hoboro, na kote meke gugua mo asa si agoi.

⁵Olaṉia sa tie pekipeki gua sapu garona sa zinama hoboro tanisa, pude lopu kote balabala ia sa sapu gilaena si asa, gua.

⁶Guana gomu palae kali nene babe napo nelaka, si pude va garunu inavoso pa limana sa tie pekipeki.

⁷Guana nenena sa tie mate nene, sa zinama tumatumae pa ṉuzuna sa tie pekipeki.

⁸Guana patu sapu ta pusi koasa kurukuru paqala, sa vina lavata sapu ta vala koasa tie pekipeki.

⁹Guana duduli rakihi pa limana sa tie vivirina sa zinama tumatumae pa ṉuzuna sa tie pekipeki.

¹⁰Guana tie gona tupi sapu gona hoboro mo, sa tie pu tabara hoboro tie pekipeki babe tie ene holadi.

¹¹Gua sa siki sapu taliri pule la ia sa luana, sa tie pekipeki sapu tavete pulei sari nana pinekipeki.

¹²Dogoria goi keke tie sapu gilaena, gua telena? Na tie pekipeki si boka tava tumatumae hola nia sapu asa.

¹³Na tie hakohako si zama, “Na laione si pa siraṉa, na laione variva matagutuna si ene pa siraṉa nomana!”

¹⁴Guana tukutuku sasada sapu sigoto koari na hinisi, sa tie hakohako sapu taliri pa nana teqe.