Zinama Tumatumae 23:12-29

¹²Va naqiti pa bulomu sari na tinarae mamu va taliṉa la koari na zinama tumatumae.

¹³Mu lopu tuqe pule nia sa ginegese koasa koburu; pana seke nia kolu goi, si lopu kaqu mate nia sa.

¹⁴Mu seke nia kolu, mamu harupia sa nana tinoa pa minate.

¹⁵Tuqu, be gilae sa bulomu, si kote qetu hola sa buloqu;

¹⁶sa maqomaqoqu si kote qetu pana zama va gotogoto sari na berumu.

¹⁷Lopu va malumia sa bulomu pude va gulea i sari tie tavete va sea, ba mu pamaṉa nia doduru totoso se Zihova.

¹⁸Hinokara, koa nana sa lineana tamugoi vugo repere, meke sa mua lineana asa si lopu kaqu ta kumata palae.

¹⁹Tuqu, va avoso mae, mamu koa gilae, mamu kopu nia sa bulomu koasa siraṉa toṉotona.

²⁰Mu lopu somana ni si arini pu napo sisigiti vaeni, babe inevaṉa turaṉi sari na tie mari henahenadi,

²¹ura sari tie naponapo meke saripu mari henahenadi si kote kamo malaṉa, meke sa puta si kote sage ni poko rikarikatadi rini.

²²Mu avosia sa tamamu pu ponigo sa tinoa, meke lopu hakohako nia sa tinamu pana kaleqe si asa.

²³Mu holu vagia sa hinokara meke lopu holuholu pania; vagia sa ginilagilana lohina, vina tumatumae, meke ginilae.

²⁴Sa tamana sa tie toṉoto si kote qetu hola; qetu si asa pu tagoa si keke koburu gilaena.

²⁵Mani qetu sari tiatamamu; mani qetu sa barikaleqe pu podo igo.

²⁶Tuqu va mae ia sa bulomu, meke sari matamu si mani doṉo luli sari qua hahanana.

²⁷Ura na maqota si na pou lohina, meke na barikaleqe barabaratana si na berukehe variva mate.

²⁸Tome aqa guana tie hikohiko si asa, meke va soku i sa sari na tie pu loke dia rinaṉeraṉe.

²⁹Esei si ta sigiti? Esei si talotaṉa? Esei si tasuna? Esei si nominomi? Esei si bakora hoboro? Esei si ziṉara matana?