Zinama Tumatumae 22:4-17

⁴Na vina pepekae meke pinamaṉa la koe Zihova si va kamo tinago, vina lavata, meke na tinoa gelenae.

⁵Sari siraṉa tadi tie kaleadi si koa i na duduli rakihi meke na sipata; ba asa pu lavelave nia sa nana tinoa si koa va seu koarini.

⁶Va tumatumae ia sa koburu pa siraṉa sapu kote enea sa, pana noma sa si lopu kaqu kekere lamae si asa;

⁷Sari tie tagotago si baṉara ni sari pu malaṉa, sa tie lipulipu si na nabulu tanisa pu veko nia gale sa.

⁸Asa pu letea sa kinaleana si kaqu paketia sa tinasuna, meke sa nana ṉinovaṉovala la pa tie si kote noso.

⁹Sa tie tataru si kote tamanae tugo si asa, ura sari gana ginani si hia lani sa koari na tie malaṉa.

¹⁰Hitu taloa nia sa tie va sisire ṉovaṉovala meke kote vura taloa sa vinaripera; vinari tokei meke vinari kukili si kote noso.

¹¹Asa pu tataru nia sa bulo viana meke memehe nana zinama si kote hiva baere ia sa baṉara si asa.

¹²E Zihova si kopu totoko nia sa tinumatumae, ba soara i Sa sari zinama tadi pu kokoha.

¹³Sa tie hakohako si zama, “Na laione si koa pa sada!” ba be, “Kote tava mate si rau pa sisiraṉa!” gua.

¹⁴Sa barikaleqe barabaratana si na pou lohina; asa pu koa pa tinaṉaziri te Zihova si kote hoqa voi vasina.

¹⁵Na koana pa koburu sa pinekipekie, ba sa kolu tinarae boka seke va seu pania mo koasa.

¹⁶Asa pu ṉoṉovali sari na malaṉadi pude vagi va soku nana, gua; meke asa pu vala vinariponi koari na tie tagotagodi si kote habahuala beto mo.

¹⁷Mu va avosi sari na zinama tadi na tie gilagilana; vekoi pa bulomu sari na qua vina tumatumae.