Zinama Tumatumae 22:18-27

¹⁸Ura kote qetu si goi pana kopu ni goi pa bulomu, meke va namanama ni goi pa berumu.

¹⁹Pude sa mua rinaṉeraṉe si koa koe Zihova, ke va tumatumae igo arau ṉinoroi, si agoi.

²⁰Na ka toloṉavulu puta zinama tumatumae si kubere ponigo rau, zinama sapu koa i na binalabala leadi na varitokae,

²¹pude va tumatumae nigo sa hinokara meke sa rinaṉeraṉe, pude boka olaṉa pa hinokara si goi koa rini pu garunigo.

²²Mu lopu hikoi saripu malaṉa sina ṉiṉiramu, sapu gua; babe ṉoṉovali sari tie habahuala pa totoso vari pitui,

²³sina kote turu turaṉi Zihova si arini, meke kote saputu vagi pule ni Sa sari likakalae koarini pu ṉoṉovali saripu habahuala.

²⁴Mu lopu la baeria sa tie bubugoro haruna, lopu koa turaṉia sa tie sapu lopu sana hoke bugoro,

²⁵na kote gua meke gugua asa si agoi meke ta hebae nia goi.

²⁶Mu lopu va egoa pude tabaria sa gale tana votiki tie, babe vekoa si keke mua tinago pude zuka ia sa lipulipu.

²⁷Sina be lopu boka tabaria goi sa gale, si sa mua teqe si kote atu saputu vagia rini sipu korapa eko ia goi.