Text copied!
CopyCompare
Buka Hope - Zinama Tumatumae - Zinama Tumatumae 22

Zinama Tumatumae 22:1-24

Help us?
Click on verse(s) to share them!
1Na pozapoza leana si ta okoraena hola, hola nia sa tinagotago nomana; meke pude ta pamaṉae si leana hola nia sa siliva na qolo.
2Sa tie tagotago meke tie malaṉa si kekeṉoṉo nia rini sapu guahe: Zihova mo si tavete beto i sari karua.
3Sa tie balabala valeana si dogoria sa tinasuna meke tome; ba sa tie pupuhuna si totoro la meke ta raza nia sa.
4Na vina pepekae meke pinamaṉa la koe Zihova si va kamo tinago, vina lavata, meke na tinoa gelenae.
5Sari siraṉa tadi tie kaleadi si koa i na duduli rakihi meke na sipata; ba asa pu lavelave nia sa nana tinoa si koa va seu koarini.
6Va tumatumae ia sa koburu pa siraṉa sapu kote enea sa, pana noma sa si lopu kaqu kekere lamae si asa;
7Sari tie tagotago si baṉara ni sari pu malaṉa, sa tie lipulipu si na nabulu tanisa pu veko nia gale sa.
8Asa pu letea sa kinaleana si kaqu paketia sa tinasuna, meke sa nana ṉinovaṉovala la pa tie si kote noso.
9Sa tie tataru si kote tamanae tugo si asa, ura sari gana ginani si hia lani sa koari na tie malaṉa.
10Hitu taloa nia sa tie va sisire ṉovaṉovala meke kote vura taloa sa vinaripera; vinari tokei meke vinari kukili si kote noso.
11Asa pu tataru nia sa bulo viana meke memehe nana zinama si kote hiva baere ia sa baṉara si asa.
12E Zihova si kopu totoko nia sa tinumatumae, ba soara i Sa sari zinama tadi pu kokoha.
13Sa tie hakohako si zama, “Na laione si koa pa sada!” ba be, “Kote tava mate si rau pa sisiraṉa!” gua.
14Sa barikaleqe barabaratana si na pou lohina; asa pu koa pa tinaṉaziri te Zihova si kote hoqa voi vasina.
15Na koana pa koburu sa pinekipekie, ba sa kolu tinarae boka seke va seu pania mo koasa.
16Asa pu ṉoṉovali sari na malaṉadi pude vagi va soku nana, gua; meke asa pu vala vinariponi koari na tie tagotagodi si kote habahuala beto mo.
17Mu va avosi sari na zinama tadi na tie gilagilana; vekoi pa bulomu sari na qua vina tumatumae.
18Ura kote qetu si goi pana kopu ni goi pa bulomu, meke va namanama ni goi pa berumu.
19Pude sa mua rinaṉeraṉe si koa koe Zihova, ke va tumatumae igo arau ṉinoroi, si agoi.
20Na ka toloṉavulu puta zinama tumatumae si kubere ponigo rau, zinama sapu koa i na binalabala leadi na varitokae,
21pude va tumatumae nigo sa hinokara meke sa rinaṉeraṉe, pude boka olaṉa pa hinokara si goi koa rini pu garunigo.
22Mu lopu hikoi saripu malaṉa sina ṉiṉiramu, sapu gua; babe ṉoṉovali sari tie habahuala pa totoso vari pitui,
23sina kote turu turaṉi Zihova si arini, meke kote saputu vagi pule ni Sa sari likakalae koarini pu ṉoṉovali saripu habahuala.
24Mu lopu la baeria sa tie bubugoro haruna, lopu koa turaṉia sa tie sapu lopu sana hoke bugoro,

Read Zinama Tumatumae 22Zinama Tumatumae 22
Compare Zinama Tumatumae 22:1-24Zinama Tumatumae 22:1-24