Zinama Tumatumae 21:3-13

³Pude tavetia sapu toṉoto meke ṉoṉo si leana koe Zihova hola nia sa vinukivukihi.

⁴Na mata va titie meke sa bulo vahesi pule si na sinea, na tinoa tadi na tie kaleadi.

⁵Sari hiniva leadi pu ta tavete valeana si vurai na lineana, ba asa pu bebeno pude va hokoti si kamo tugo pa minalaṉa.

⁶Sa tinago sapu ta vagina pa mea kokohana, si tuturei vuga palae meke na sipata variva mate si asa.

⁷Sa tinavete variva mate tadi tie kaleadi kote turaṉa va seu ni, ura korodia tavetia gua sapu toṉoto.

⁸Sa siraṉa tadi pu ele sea si koqi, ba sa hahanana tadi pu lopu tavete sea si toṉoto.

⁹Leana hola si pude koa pa keke hukihukirina sa batu vetu, hola nia pude koa turaṉia pa keke vetu sa barikaleqe nominomina.

¹⁰Sa tie kaleana si ovia nia sa kinaleana; lopu hite tataru nia sa sa turaṉana.

¹¹Totoso tava kilasa sa tie va gugue, si vagi ginilagilana sa tie pupuhu; ba pana ta tarae sa tie gilae, si tumatumae si asa.

¹²Sa Tamasa eke mo si toṉotona meke dogoro vagi sari na vetu tadi na tie kaleadi; meke va kamo ni tinasuna Sa.

¹³Pana tuku taliṉa sa tie koasa kinabo tana tie malaṉa, si asa ba kote kabo vura meke loke tie kote avosia.