Zinama Tumatumae 21:14-30

¹⁴Na vinariponi tomena si va ibu binugoro, na poata ta vala golomona si va bule tinaṉaziri.

¹⁵Pana ta evaṉa sa tinoṉoto si qetu sari tie toṉoto, ba sari tie kaleadi si matagutu.

¹⁶Sa tie sapu rizu koasa siraṉa tanisa ginilagilana, si kote kamo la koa sa vinarigara tadi tie matedi.

¹⁷Asa pu okoro nia sa kinoa leleana si kote malaṉa; asa pu okoro nia sa vaeni meke sa ginani arilaedi si lopu kaqu tagotago.

¹⁸Sa kinaleana si ta kasie koasa tie leanana meke la koasa tie kaleana, meke sapu koasa tie toṉotona si la koasa tie lopu ta raṉena.

¹⁹Leana si be koa pa popoa qega, hola nia si be koa turaṉa barikaleqe nominomi meke bubugorona.

²⁰Pa vetu tanisa tie gilae si kobi ginani na oela leanadi, ba sa tie pekipeki si va betoi sa sari doduru pu tagoi sa.

²¹Asa pu hata lulia sa tinoṉoto meke tataru, kaqu dogoria sa tinoa, kinoa va leana, meke vina lavata.

²²Na tie gilagilana boka raza ia sa vasileana lavata tadi tie ṉiṉira, meke huara gore nia sa goba sapu raṉeraṉea rini.

²³Asa pu lavelave nia sa ṉuzuna meke meana, si kopu pule nia pa tinasuna.

²⁴“Tie va gugue” pozana sa tie vahesi pule nia meke va titie; balabala va gore tie si asa koari nana tinavete.

²⁵Sa inoko'okoro tanisa tie hakohako si kote va matena sa, sina lopu hiva tavetavete sari limana.

²⁶Doduruna sa rane si soku hola pule si koa okoro ni sa, ba sa tie toṉoto si variponi meke lopu tuqe pule.

²⁷Sa vinukivukihi tanisa tie kaleana si variva maledere, meke pana lulia pule kaiqa hiniva kaleadi si kote vea beka?

²⁸Sa tie va sosode kokoha si kaqu mate, ba sa zinama tanisa pu ta ronu si kote ta avoso.

²⁹Sa tie kaleana si kote va matamataqarae kokoha, ba sa tie toṉoto si kote balabala paki meke tiqe zama pa hinokara.

³⁰Loke ginilagilana lohina, loke tinumatumae, loke hiniva, si kote bokaboka hola nia se Zihova.