Zinama Tumatumae 21:13-20

¹³Pana tuku taliṉa sa tie koasa kinabo tana tie malaṉa, si asa ba kote kabo vura meke loke tie kote avosia.

¹⁴Na vinariponi tomena si va ibu binugoro, na poata ta vala golomona si va bule tinaṉaziri.

¹⁵Pana ta evaṉa sa tinoṉoto si qetu sari tie toṉoto, ba sari tie kaleadi si matagutu.

¹⁶Sa tie sapu rizu koasa siraṉa tanisa ginilagilana, si kote kamo la koa sa vinarigara tadi tie matedi.

¹⁷Asa pu okoro nia sa kinoa leleana si kote malaṉa; asa pu okoro nia sa vaeni meke sa ginani arilaedi si lopu kaqu tagotago.

¹⁸Sa kinaleana si ta kasie koasa tie leanana meke la koasa tie kaleana, meke sapu koasa tie toṉotona si la koasa tie lopu ta raṉena.

¹⁹Leana si be koa pa popoa qega, hola nia si be koa turaṉa barikaleqe nominomi meke bubugorona.

²⁰Pa vetu tanisa tie gilae si kobi ginani na oela leanadi, ba sa tie pekipeki si va betoi sa sari doduru pu tagoi sa.