Zinama Tumatumae 20:4-17

⁴Na tie hakohako sapu lopu tavete inuma pa totoso, ke pa totoso pakepakete si loketoṉa dogoria.

⁵Sari hiniva tanisa bulo tie si guana lamana peava, ba sa tie gilagilana mo boka siovo vurani.

⁶Soku rina tie va rutia sa tataru loke kokoina; ba avei sa tie sapu boka ta ronu?

⁷Sa tie toṉoto si koa ia sa tinoa sapu loke tinazutuna; mani tamanae sari tuna meke sari dia koburu.

⁸Totoso habotu sa baṉara pude varipitui, si pa matana mo doṉo gilania sa sa kinaleana.

⁹Esei si boka zama guahe, “Ele kopu nia rau sa buloqu pude loke tinazutuqu; ke via si rau meke loke qua sinea?”

¹⁰Sari padapada mamata meke pada ginele kokohadi si hakohako beto ni e Zihova.

¹¹Ura boka tumae nia goi sa koburu koari nana tinavete, be sari nana hahanana si toṉoto meke leadi.

¹²Taliṉa sapu avavosae meke mata sapu dodogorae, si tavete betoi e Zihova.

¹³Kakala puta, na kote malaṉa nia goi; tavetavete ṉaliṉali, meke kote soku nigo ginani.

¹⁴“Lopu leanadi, lopu leanadi!” gua sa tie hiva holu vagidi; meke la vivinei nia sa sapu leanadi sapu holu vagi sa.

¹⁵Qolo si koa mo, meke patu ṉedala si soku hola, ba sa beru pude zama nia sa tinumatumae si arilaena hola ni.

¹⁶Vagia sa poko tanisa tie pu va egoa pude lipua sa gale tanisa votiki tie; tuqe vekoa osolae lipua sa sa gale tanisa tie karovona.

¹⁷Na ginani ta hikona si lomoso pa tie, ba pa vina betona si kote guana siṉia onone sa ṉuzuna.